علّق الفنان أحمد جمال على قرار منع أغاني المهرجانات، قائلا: "مفيش حاجة اسمها تقدر تمنع أغاني المهرجانات، إحنا دلوقتي في عالم مفتوح، وبنتكلم دلوقتي عن فكرة المنع وبعد كده طرق المنع، لكن السؤال هنا هل أنا همنع علشان المهرجان مُضر مثلا أو بياخد الأجيال اللي جاية في حتة معينة؟، ولكن هل لما المهرجان يتمنع الأجيال مش هتلف وراه علشان تسمعه؟".
وأضاف "جمال"، خلال حواره مع الإعلامية خلود زهران، في برنامج "هذا الصباح"، المذاع على فضائية إكسترا نيوز، أن لكل مقام مقال، يعني هل مثلا أغاني المهرجانات بتنافس الأغاني بتاعتنا في الشكل والمضمون؟، أكيد هما ليهم منطقة واحنا لينا منطقة أخرى.
وتابع، "أتوقع لما شخص ييجي ينام وعاوز مزيكا حلوة علشان ينام وهو بيسمعها أكيد مش هيشغل مهرجان، إنما واحنا رايحين فرح بنحب نسمع مهرجانات في وسط الأغاني الكتير اللي شغالة من أغانيا أو أغاني أي حد غيري هنبقي عاوزين نسمع مهرجانات".
واستطرد، "كل شكل من الأغاني الموجودة له مكانه، يعني الأغاني اللي بتتغني في الفرح غير اللي بتتغني على مسرح الأوبرا، وأنا مش ضد الفكرة ولكن هو المهرجانات شكل من أشكال الغناء".
