ريموندا رؤوف
المونتيسورى مجال الحياه العمليه
انشطه من مطبخك سيدتى
مجال الحياه العمليه هو المجال الاول و الأساسى فى المونتيسورى
بيعتمد على انشطه تنميه مهارات منظمه من حياتنا العمليه اليوميه
زى مثلا
_نشاط أن الطفل ينقل حبات فول ناشف من طب لطبق بايده ويرجعهم تانى
ولما الطفل يكبر شويه ينقلهم بمعلقه
_نشاط غسل الاطباق
_نشاط تقطيع الخيار أو الموز
_فتح الازايز مختلفه الأحجام وغلقها
......الخ
غير كمان أن ف انشطه رعايه ذاتيه
يعنى بتساعد الطفل يساعد نفسه
زى
_أنه يتعلم يقفل زراير الجاكت أو القميص
_او أنه يربط رباط الشوز
....الخ
ممكن تعملوا سيرش عن
Montessori practical life
او مونتيسورى حياه عمليه
وتشوفو الصور والأنشطة
طب السؤال بقى الكلام ده مفيد ؟.
اكيد طبعا تعالو افهمكم
1_الحاجات دى لو بنعملها طول اليوم فهى مش كلها سهله على الطفل ولو عرف يبتديها مش بيعرف ينتهى منها فلما بنقسمهم انشطه بخطوات بتبقى سهله للتدريب وانت تبقى عارف ابنك عارف يعمل ايه لحد فين
2_ الحياه العمليه بتقوى عضلات الطفل✋🏻 الصغرى اللى هى عضلات الكتابه
اللى اصلا الطفل مينفعش يكتب قبل سن 5 سنين وف نظريات بتقول 6
وقبل ما يكتب✍🏻 يعمل الانشطه دى عشان عضلاته تشد
3_بتساعد الطفل على حاجه اسمها تآزر بصرى حركى👀
يعنى بتخلى عين الطفل متوافقه مع حركات أيده 🖐🏻
4_بتوصل للطفل مبادئ النظام والترتيب عشان الانشطه بخطوات منظمه
5_بتكون تمهيد للكتابه
ده احنا كمان بتشتغل الانشطه باتجاه الكتابه
يعنى ايه ؟
يعنى مثلا نشاط مسح الترابيزه لو هشتغلو بالانجليش
همسح من الشمال لليمين
عشان ايد الطفل تتعود
وهكذا
حقيقى الموضوع من بره تحسوه ايه الهيافه دى 😂 والامهات لما تشوف مراكز وحضانات شغاله حياه عمليه بيستهيفو الموضوع
بس الموضوع أشد من كده بكتير ومهم اوى
ف قاعده اساسيه لما تشتغل النشاط
1_ان يكون ف مفرش مستطيل بتشتغل عليه وفوقيه صينيه للنشاط
ليه ده؟
عشان بتعلم الطفل الحدود فى الشغل
ومش عندنا كلمه لعب دى خالص 🥰
عندنا كلمه +شغل+
هتلاقى ولادنا بيقولو دايما هنشتغل ايه💪🏻🤷🏻♀️
2_الطفل بيمسك حاجات حقيقيه بس على اده ومتخافوش بس ناخد بالكم منهم وتعلموهم صح
يعنى بنتى بتمسك سكينه حقيقيه بس صغيره على اد لديها
وبتمسك مقص حقيقى
بس صغير على اد اديها
بلاش الحاجات البلاستك اللى ملهاش لازمه دى
المهم تعلموهم وتدربوهم وتلاحظوهم وتفضل جنبهم لحد مايتدربو
انا بقى كام استفاد ايه؟😍
ابحثى فى مطبخك هتلاقى حاجات كتير ابنك يحب يشتغل بيها ويبقى مستمتع جدا جدا
بس كده
ده لينك البوست اللى فات للمونتيسورى كان مقدمه
والصور اللى حطهالكم من جوجل دورو هتلاقوا اكتر
اخر حاجه عايزه اقولها هدف البوستات عز أنها تساعدك تبحث وتدور ..البوست مش بيقول كل حاجه ..الكلام ده بياخد وقت فى الدراسه .. يعنى الحياه العمليه بتاخد معانا فى المركز 12 ساعه تدريب وف مراكز بتعملها ف اكتر من كده
ف مهم نبحث وندور احنا
