بقلم جورج حبيب ( سيدني-استراليا )
الست فلانه ست اجتماعيه
لها علاقات مع دي ومع ديه
تحب تجمع الاخبار اللي هيه
وتسال فلانه وفلانه علي طوول
علشان ممكن معلومة تروح
مركز معلومات وطبق فوق السطوح
تستقبل من هنا وبالاخبار تبوح
المعلومه توصل وفي دقيقة تنشر
علي طول تعمل اتصالات وتقرر
وتفسر الاخبار وتحلل بطريقتها
وخيال بعيد في مخيلتها
واذا اتسالت مش ممكن تقول معرفش
دا عيب كبير من عيوب العصر
وتحب تعرفك الاخبار
وان مسالتش هي تحتار
توصلك المعلومه ازاي
طيب ما تطلب فلانه
وتقول لها ليه زعلانه
ليه بي مبتتصليش هو انت مدرتيش
مش فلانه حصلها كيت وكيت
لسه عارفه ومن الخبر بكيت
والخبر تلاقيه عادي
لا مستاهل ولا له داعي
بس يعني الاخبار من غير راعي
وناس حصل عندهم موقف
ومكتمين علي الخبر اصله محرج
وحاجه خصوصي
محتفظين بيها
ومش قابلين كلام فيها
تدخل هي وتبحث
والحجه عايزه تطمن
بس شوية اخبار
ولا تسيب الناس تحتار
ياستي الله يخليكي
خليكي في حالك
واحتفظي لنفسك باخبارك
ويا ما ناس ضاعوا
واخرين يقولوا برافو
نقل الاخبار دي خطيه
ونتيجتها في النار مرميه
خليك في حالك وكفاية
وانس ودانك تكون مليانه
تعيشي كده في سلام
واتركي الناس في امان
