ماجدة سيدهم
كتير بلاقي اعلانات فاخرة وفاجرة فعلا عن فيلات وقصور  معروضة للبيع  مع وصف تشريحي واو  لسكن الأحلام الخرافي ..

بجد شيء مبهر ...أحيانا بيصيبني  الفضول ادخل واتفرج ... اغلبكم  أكيد  بيشوف كم التعليقات واللهفة اللي الناس بتدخل وتعلق كأنهم بيقولو الحقونا  فورا بالسعر وشروط الدفع فورا  ..إحنا ع الباب أهو جاهزين بالملايين ..الغوث نرجوكم ،😁

كل دا عادي ..اللطيف  لما هزني الفضول ودخلت صفحات بعض المعلقين لقيتهم  ناس أبسط مما يكون في كل شيء  ..طيب إزاي ..مش عارفة ..!
وبعدين  قيل لي   ربما أن بعض من الناس دي بيدخلوا   يعلقوا   فقط  علشان يعلو التفاعل  مع الشركة المعلنة ..برضه عادي جدا  واهو كله شغل ..

الأظرف بجد ..وأنا باتفرج  في مرة على واحدة  من الفيلات المرعبة دي والمعروضة للبيع كفرصة ذهبية ... ومطبخ أمريكاني وهم .. لاحظت  انه متعلق قطعة من ملابس داخلية رجالي على مقبض فرن البتوجاز .😁.  مش أوي كدا ياجماعة  ..دا ملايين بتتفرج  برضه ..
يعني  معانا فيلا بملايين  وأثاث من كل حتة في العالم  ووقفت على فوطة  المطبخ ..🤔.

 يظهر  مافيش فرق بين بايع بالملايين ومشتري  بملايين برضه  بس مع تعليقين ولايك كمان  ..
نفس الدماغ   😭ونفس ال.....فوطة  ..
والمهم هي لغة الملايين السهلة دي