محمد أبوقمر
بص يا أخ علي ، في أسباب للرقي الإنساني والتقدم الحضاري ، وفي طبعا أسباب للتخلف والانحطاط ، كل شيء واضح للي عايز يشوف ويعرف إيه إللي خلا بعض الأمم تتقدم وترقي ، وإيه إللي خلا أمم أخري وتقريبا أنا وإنت منهم يدوب بتتفرج علي إللي بيحصل في العالم دون أي إمكانية للمشاركة ، ودا طبعا وضع مهين ومخزي ، وأظنك زي حالاتي كده مقروف من نفسك......
التقدم والرقي يا أخ علي مش ضربة حظ ، ولا يمكن حدوثهما بمجرد التمني أو الدعاء ولا بالفتاوي ، التقدم والرقي يا أخ علي يحدث حين يدرك الناس معني وجودهم الإنساني وحين يدركون معني التكليف الإلهي لهم بتعمير الأرض .
إللي اتقدموا يا أخ علي معندهمش قيمة أعلي من قيمة ، كل القيم هناك متساوية في الاحترام والقداسة ، لكن إللي حصل إنهم عرفوا إيه القيمة إللي المفروض تخدم الأخري ، يعني مفيش إسقاط لأي قيمة ، إنما علشان الإنسان ينطلق في سبيل تطوير الحياة والرقي بذاته جعلوا كل القيم في خدمة حياة الإنسان علي أساس أن الله أرسل رسله ورسالاته لخدمة البشرية وإزاحة كل ما يعرقل حركتها وهي في سبيل إنجاز مهماتها الإلهية التي خلقها الله من أجل إنجازها.
جايز يا أخ علي في أسباب تانية للتقدم والرقي ، فأنا بصراحة مش خبير ، ومقدرش أقطع بصحة كلامي ، خصوصا إن في بعض الناس إللي لهم وزن وقيمة عندك وعندي بيقولوا إن ربنا سخر الناس الكفرة علشان يخترعوا ويكتشفوا ويعملوا كل الحاجات المبهرة لخدمة الناس المؤمنين إللي أنا وانت منهم ، وفي ناس لهم وزن وقيمة برضه بيقولوا إن سبب تخلف إللي تخلفوا هو البعد عن ربنا وعدم الالتزام بتعاليمه ، وفي ناس برضه موزونين أوي بيقولوا إن تطبيق الشريعة هو إللي هايعدل الأمور ويطلعنا لقدام .
كلام كتير بيتقال يا أخ علي ، وأنا معرفش في الحقيقة أقولك فين الصح وفين الغلط ، إنت لك عقل وأنا مش وصي عليك ، ثم إني زيك كده يقولولي الحضارة الأوربية حضارة مادية متفسخة كافرة أقول آمين ، يقولولي إحنا بس إللي هاندخل الجنة وباقي الناس كلها هاتدخل النار مهما أبدعوا من منافع للبشرية أفرح ، يقولولي عقلك قاصر عن الفهم أرتاح وآديني باكل زيك واشرب وأردد دعاء الركوب في كل ميكروباص أركبه ومتكيف وأحوالي عال العال.
