جورج كرم
ويا أخوتنا الأرثوذكس هلمُّوا نتحاور
كلنا بنسمع عن"الموارنة" وعارفين إنهم عايشين في لبنان، وأغلبنا يعرف إنهم" كاثوليك"
لكن اللي ميعرفهوش كتير مننا إن الموارنة سبب تسميتهم راجع لشخص مش لعرق معين زي"الأقباط، السريان، الأرمن، الأحباش" مع إنهم سريان برضه بس مسمَّى الموارنة هو اللي صار غالب ع تسميتهم.
القديس اللي بينتسبوا له اسمه" القديس مار مارون" ودا راجل كان عايش ع جبل كورش(ف المنطقة اللي بين عفرين وحلب ف سوريا) واتنيح حوالي سنة 410 ميلادية(يعني قبل مجمع خلقيدونية)، كمان كان بينه وبين ق.يوحنا ذهبي الفم مراسلات، ودا اللي بيظهر من دراسة الرسالة اللي بعتها ذهبي الفم لمَّا كان في المنفى له وكان بيناديه ب"مارون الكاهن والراهب" والموجودة ف المجموعة 36 من رسائل ق.ذهبي الفم في مجموعة(مكتبة الآباء الشرقيين للأب مين المجلد 52) المشهورة، ومن مقدمة الرسالة نفهم حجم احترام وتبجيل ق.يوحنا لمار مارون.
نيجي بقى لسؤال حضرتي:
هو ليه مفيش عندنا في كنيستنا القبطية الأرثوذكسية كاهن اسمه مارون؟
مع العلم إني برضه معرفش حد علماني اسمه مارون من الأقباط.
ليه محدش م الأساقفة قام بسيامة كاهن بالاسم ده مع إن الراجل اتنيح قبل خلقدونية؟
(تقدر تتأكد م المعلومة دي من كتاب أ.حلمي القمص يعقوب، يا أخوتنا الكاثوليك متى يكون اللقاء؟..الجزء الأول ص 227).
وواضح إنه كان تقي وسليم الإيمان، ودا اللي فهمته من رسالة ذهبي الفم له لدرجة إنه بيطلب منه إنه يصلي لله من أجله.
أسئلة مشروعة، وخطوات نحو التقارب والوحدة، دا كل هدفي.
وكل سنة وكل كاتوليك العالم بخير
وبنعيد برضه ع حبايبنا السريان الأرثوذكس اللي فطروا ف يوم(25 ديسمبر) واللي مش(أناثيمان) ومش هيروحوا النار لأنهم فطروا عكس تقويمنا المتسلِّم لنا من المسيح ذاته زيه زي أدوات المذبح بحسب الفِرْيَة الأغاثونية.
#مار_مارون
#كاهن_اسمه_مارون
#عشانا_عليك_يارب
