مرقس كمال
كتير بنمر بأوقات بنبقى فيها مضغوطين ومزحومين وبنعافر ونقول ياااااه لو نقدر ناخد هدنة اجازة كده يومين فى اى حته نفصل شوية عشان نقدر نرجع نكمل ونواصل

وحتى لو مش نافع نروح مكان بنحاول نفصل واحنا فى بيتنا عشان نجدد طاقتنا

ساعات بقى وانا بكلم ربنا كنت اقوله يااااه يارب لو اقدر اخد يومين عندك فى السما افصل بيهم

وكنت اقوله يارب انا معرفش انت هتعملها ازاى بس انا واثق انك تقدر تتصرف زى ما انت معودنى وبعدين دول هما كلهم يومين بس اقضيهم عندك وترجعنى تانى

وكنت اسرح كده واتخيل لو ده حصل حقيقى هعمل ايه وكنت اغمض كده واشوف هقابل مين وهقول ايه وهتكلم ازاى والاقينى عملت حوارات وكلام مع كل قديس اعرفه او معرفهوش

والاقينى وقفت ارنم واسبح مع حبايبى اللى سبقونى واللى استقبلونى بحفاوة وأحضان واللى بسبب كل حد فيهم اشتياقى للسما كان بيزيد كل يوم

وحقيقى كنت بشوفنى هناك فرحان ومزقطط وطاير بشكل غير طبيعى

والحقيقة إنى كل مرة كنت بعمل فيها كده كنت بكتشف كذا حاجه

اولها ان القلب والعقل والكيان والمشاعر ربنا بروحه القدوس اللي جوانا مخليهم متعلقين ومتشوقين حقيقى للسما ولمتعة الحياة فيها

وده بيخلينى بشوف أمور الحياة من زاوية مختلفة عن السائد والمعتاد والمفروض او لو عاوز الحق اللى احنا عملناه مفروض

وبيخلينى حقيقى مش شايل هم حاجه ولا متمسك بحاجة ببسطها يعنى على قد ما اقدر

بيخلينى معرفش أكره او اخاصم او انتقم او ادين معرفش ابخل بمشاعرى او بأى شئ ربنا مديهولى غيرى محتاجه يتسند ويتقوى بيه

بيخلينى اعيش اليوم بيومه وكأن كل يوم بعيشه هو الاخير وكأنه فى اى وقت هيقولى يالا الاجازة دى مش زى اللى فاتوا المرة دى من غير رجوع ها جاهز؟؟ وطبعاً هقوله كالعادة لأ لأنى معتمد عليه هو اللى ينقى ويبرر ويجهز

اما تانى حاجة اكتشفتها هى ان بعد ما الوقت بيمر وافوق كده من السرحان ده بكتشف انى فعلاً كنت فى السما وفعلاً فصلت شوية وفعلاً اخدت الاجازه اللي طلبتها من ربنا وكأنه اخدنى عنده حقيقى ورجعنى تانى عشان اكمل بقوة ومعونة اكبر

معونة متتوصفش أبداً ولا اعرف اعبر عنها وكمان بلاقى الشوقة واللهفة للسما بتزيد جوايا اكتر واكتر

حقيقى السما قريبة اوى مننا وحقيقي هى جوانا وحقيقي هى بتتعاش هنا الأول ولو الحياة واخدانا اوى ومش شايفينها نبقى عايشين موت مش حياة

وحقيقي يابختنا بالسما والمسيح الي بيغرقنا حب وبيسبينا دايما وبيدوقنا متعة وحلاوة الحياة معاه بفرح

وحقيقي حقيقى مفيش أروع من اننا كل شوية نخطف لنا كده اجازة فى السما

مرقس كمال
#شخابيط_انسان