كتب – محرر الاقباط متحدون ر.ص
هاجم الناشط الحقوقي "محمد السماك" الإعلامية ريهام سعيد، لمواصلتها معاملة الآخرين دون أحساس، في رسالة عبر حسابه على "فيسبوك" حملت عنوان "إزاي تكون إنسان معدوم الإحساس"، وتقول الرسالة :
الاعلامية ريهام سعيد الغنية عن التعريف أكثر من يثير الجدل حوله بغرض الدعايا وبمبدأ تظل الدعاية السيئة هي دعاية جيده برنامجها صبايا الخير والذي لم يقدم خير سوي حلقات عن الجن والعفاريت والخزعبلات والقضايا المصطنعة الرخيصة.
ريهام عملت لقاء في منزل مضيفة طران بشركة مصر للطيران (على المعاش) اسمها "مها" لرعايتها ١٤ كلب في منزلها بحب وشغف، وحقيقي بعد الحلقه دي انا اتأكدت ان في حالات كتير معاشرة الكلاب أفضل بكتير من معاشرة البشر.
مها قررت توهب عمرها ووقتها في تربيه الكلاب وبعد ما طلعت معاش وملهاش حد أصبحت حالتها الماديه على ادها والكلاب بتبهدل المنزل لكنها متقبلة اي حاجه منهم لأنها بتحبهم، تقوم ريهام بكل حقاره تقول للمصور صور صور البيت عامل إزاي، انتي ازاي عايشه هنا انا بقالي ٣ دقايق وحاسه اني هيغمي عليا.
انتي معندكيش أثاث خالص، ايه ده انتي معندكيش تلفزيون، انتي معندكيش تلاجه، مش زعلانه من شكل دولابك والحيطان، تعالي صور الأوضه دي فترد مها بانكسار "دي اوضه نومي" فتفتح الباب برضو بكل خسه وتقول للمصور أدخل صور، انتي ازاي بتنامي هنا هي دي اوضه نومك بجد.
انتي يا ريهام ترضى حد يقتحم خصوصية منزلك ويصور اوضه نومك ويحقر منها بالشكل ده ليه مفيش إحساس بآلام ومعاناة السيده في فتره كلامها معاكي، أنا على تمام الثقه إن اثناء فتره معاشرتها للكلاب ملاقتش حقاره زي دي.
وتواصل ريهام لا إنسانيتها..هو إنتى زعلانه إنك مخلفتيش ومعندكيش عيال طب لو خلفتي كنتي هتربي كلاب انتي بتربيهم طيب عشان مبتخلفيش ريهام مش اول مره تستخدم الأسلوب الرخيص ده ولابد من معاقبتها على تنمرها وتحقيرها للسيده مها.
