محمد محمود
الأستاذ بهلول ابن شملول ابن مركوب ابن مستلقي سليل صعصعة ابن أحيحة العنزي، شايف إننا لازمن ولابد نرجع لورا يجي بتاع شوعرميت سنة ضوئية عشان نركب العالم وندلدل رجلينا ونبرطع في مخاليق خلق الله ايشي سبي وايشي دبح وايشي خوزقة وايشي حرق وايشي اغتصاب وركوب مبارك حلال بلال زولال ولا احلى...
وشايف سيادته لا فض فوه لا هو ولا اللي خلفوه، إن شوب بول بعير طازة من مؤخرة ناقة حولة ابرك وأنفع مليون مرة من ازازة دوا كحة ولا شريط بورشام ولا حقنة تاخدها ولامؤاخذة في العضل، لأن ده منصوص عليه في تذكرة جدنا الكبير صخر بن خزاعة بن المتعاص...
وشايف سيادته برضك ان شرطة محجم احسن من مبضع جراح وان الكوي ده اخر تحديث للعلاجات اللي هي، وإن الحجامة دين وحبة البركة احسن من حبة الاوميجا ثري والرويال جلي، وإن فرشة السنان بدعة والأصل السواك الي طالع من جيب الجلابية اللي فوق...
وسيادته عارف ومتأكد ان الارض مسطحة وليها حافة لو روحت عندها وممسكتش نفسك ح تقع وتروح في طوكر يا مؤمن، وإن الهري بتاع الأرض كروية وبتلف ده كله كله كلام فاضي ومؤامرة من اليهود وامريكا عشان يفتنوا آل أحيحة عن دين أبوهم....
وبهلول مؤمن تماما إن فيه تعبان أقرع كان عامل شعره فورنيشة وحلقه عشان يستخبي لك في القبر ويخضك وبعدين ينزل فيك رزع وهبد ويقرعك بالمقرعة تنزل تحت الارض سبعين خريف وخمستاشر صيف وتلاتة من عشرة ربيع وقفل لي على كل الجرابيع....
وبهلول شايف ان الحل الوحيد لكل متاعبنا الاقتصادية ومشاكلنا النفساوية هو الغزو، يعني نطلع كدا كلنا بربطة المعلم هيلة بيلا وننط على أول بلد تقابلنا بيعيش فيها الكفار، وعندك يا جدع امسك قفش ربط سفر على فسطاط الإيمان، وترجع لك يا مؤمن بربطة اسري، تركب دي وتبيع دي وتستعبد ده وتركب ده برضو ما يضرش ويوم ما تتزنق تنزل السوق تبيع لك راس ولا راسين وتفك زنقتك وربك يعوض في غزوة تانية واهو كل يوم برزقه...
وحفيد أحيحة معندوش مشكلة في جبل الزبالة اللي تحت بلكونته وأدام بيته وفي طريقه للشغل بتاعه ولا أدام الكلية بتاعته اطلاقا، ولا عنده مشكله في الغلابة اللي بيناموا في عز التلج على الرصيف ومش لاقيين لقمة ناشفة ياكلوها ولا عنده مشكلة في مشاكل بلده السياسية وبلاوي الفساد والطين اللي عايشين فيه، لكنه غضنفر واسد وسبع الليل لما يشوف واحدة لابسة فستان حلو ولا عاملة شعرها تسريحة جميلة ولا يسمع عن ناس بتهزر مع بعض شوية، تبص تلاقي يا جدع نفس ذات حفيد أحيحة اللي كان نايم وبيشخر من شوية، يقوم يهب ولا وابور جاز عتيق ويقولك الا الدين يا ولاد دين ال *** ويتحول بقدرة قادر الي مجاهد فيسبوءي ويروح لاطعك بوست إيماني يفرقع في وشك متبقاش عارف تروح فين وتيجي منين....
حفيد أحيحة وسليل القعقاع ورباية عفراء عنده حول تاريخي وحمل كاذب ح يفضل شايله في بطنه وكل ما يتزنق يفسح عن نفسه شوية في وشنا ويقرفنا وكل ما يتحط في مزنق يقوم طالع لك بالكلمة الطاهرة بتاعته، ليس من الإرهاب في شئ والإرهاب لا تين له.....
اخر افتكاسات أحيحة ان الفراعنة مؤمنين وموحدين وعشان يثبت لك الافتكاسة قام جايب لك نص ديني بيتكلم عن واحد من قوم فارعون كان مؤمن ( مش بتاع السندوتشات) قوم ييجي ابن عمه اللي هو من أحفاد أحيحة الأصلي يرد عليه ويقوله حمرا.... انت كداب وعينك حمرا ( مشيها عينك معلش) ويروح هابده نصين تلاتة أربعة قول عشرة متعدش إن فارعون وقومه كانوا مفسدين وأنهم كانوا وكانوا وعلي اصلهم بانوا، يقوم أحيحة يرد على ابن عمه وابن عمه يرد على أحيحة، ونفضل احنا بين أحيحة وابن عم أحيحة تايهين ومش عارفين نقول ايه ولا نعمل ايه....
أحيحة وبهلول وشملول ومتعاص ومركوب عايشين وسطنا وموسخين الدنيا ومظروطين قلب المكان وفاضل لهم تكة صغيرة ويقلبوا البلد زريبة بلدي كله هايج فيها على كله...
خلي بالك من أحيحة وشركاه وابن المتعاص واحفاده
