محمد أبوقمر
المرأة ناقصة عقل ودين ، كويس خالص ، أفهم من كده إن كل النساء معندهمش عقل؟؟؟!!! ، النساء المسلمات بس ولا جميع النساء؟؟؟!! ، أنا بسأل السؤال ده لأني ملاحظ إن نساء كتير في العالم أثبتوا تفوقا عقليا كبيرا حتي علي الرجال ، ميركل مثلا زعيمة واحدة من أقول الدول علميا واقتصاديا وفي كافة المناحي ، وكتير من نساء أوروبا وأميركا واليابان أثبتوا جدارة علمية وأدبية وفنية وسياسية وفي مجالات تانيه كتير ، ثم إن نساء الفراعنة كانوا ملكات وثبت أنهم قادوا دولتهم قيادة حكيمة.
يبقي أكيد إنتم تقصدوا إن النساء المسلمات بس هما إللي ناقصين عقل ودين ، بس في حاجه برضه في النقطة دي مش مفهومة خالص وهي : هل ينطبق كلامكم ده علي السيدة خديجة والسيدة عائشة رضي الله عنهما؟؟!!.
بصراحه كده أنا عايز أعرف منكم هل مسألة نقصان المرأة للعقل دي عامة علي كل النساء ولا مقصود بها نساء معينين؟؟ ، خصوصا إن المرأة إللي بتقولوا عليها ناقصة عقل دي هي إللي بتربي الراجل وتخليه يعرف يتكلم وسط الرجاله ، وبالمناسبة إيه رأيكم في الرجل ، في الرجالة عموما ، هل جميعهم عقولهم مكتملة ولا في صنف كامل وصنف نص نص وصنف معندوش عقل خالص ؟؟.
هل معقول المرأة إللي ناقصة عقل تربي راجل عقله كامل خالص خالص؟؟ ، طيب إيه رأيكم في الراجل إللي بيطيع المرشد طاعة عميا؟ ، دا عنده عقل ولا في فردة جزمة قديمة مكان عقله؟؟ ، طيب الراجل إللي بيفجر نفسه دا تصنيفه إيه؟ ، ولا إللي بيسرق ، وإللي بيتحرش ، وإللي بيخون بلده ، أو إللي بيلعب قمار ويضيع فلوسه ، ولا إللي بيطلق مراته ويرميلها عياله ويروح يتجوز واحدة تانية؟؟!! ، ياجماعة ياخلق هوووه المسألة دي عايزه مراجعة ، دوروا وحياة أبوكم في الكتب إللي بتطلعلولنا منها شرب بول البعير وإرضاع الكبير ونكاح الصغيرة يمكن تلاقوا حاجه تخلصنا من الروشه إللي إنتم روشتونا بها دي ، ياجماعة في رجالة عرة ، رجالة مُسخة ، في رجاله الحمار بيفهم أحسن منها وفي نساء الواحده منهن بألف راجل ، ياجماعة المرأة هي إللي بتربي الراجل وهي إللي بتخليه يتجصعن قدام الميكرفون ويعمل فيها بيفهم ويتكلم عن المرأة إللي ربته بكل احتقار
