د. محمد طه
د.محمد.. أنا تابعت حضرتك من حوالى سنة، و كنت انفصلت عن خطيبتى الأولى.. دلوقتى أنا خطبت بنت تانية من حوالى ٣ شهور، اتعرفت عليها عن طريق أختى، وسُمعتها كويسة جدا فى شغلها وهى أستاذة جامعية.. بس من الأول عندى احساس انها فيها حاجات مش مظبوطة.. وحصلت تجاوزات بينا، و بعد كده اعترفتلى إنها بتشاهد افلام اباحية من أولى ثانوى وهى دلوقتى عمرها ٣٠ سنة، و بتمارس العادة السرية مرتين فى الأسبوع.
من ساعتها أنا متخوف منها، وإحساسى ناحيتها اتغير، وحسيت بخوف منها، وانها أخلاقها مش كويسه، وبقيت مشغول فى كل تفصيلة، وهل أنا أول حد يحصل كده معاه و لا لأ.
أنا عارف إن الناس كلها بتقول ملكش دعوه باللى قبل كده، أو اللى بيحصل بين الشخص ونفسه، بس أنا خايف أطلع مغفل وآخد واحده أخلاقها مش كويسة، وفى نفس الوقت أنا تعبت لما سيبت خطيبتى الأولى، ودخلت فى اكتئاب لسه بتعالج منه لحد دلوقتى، وحسيت إنى كنت غلطان لما سبتها، ومش عارف أقرر أستمر ولّا أضغط على نفسى شوية، وأقاوم احساس الخوف، والدنيا بعد كده حتبقى أحسن؟
أخى العزيز..
سؤالك مهم جدا.. علشان كده مش هاجاوب عليه..
ماتستغربش.. أنا هاخليك انت اللى تجاوب عليه.. دايما الاجابات اللى بتطلع من جوانا بتكون أفيد.. والطرق اللى بنكتشفها بنفسنا بتكون أفضل فى الوصول..
هاسألك ثلاث أسئلة.. وأرجو أن تساعدك اجابتك انت شخصيا عليهم فى الاهتداء للقرار المناسب ليك..
السؤال الأول:
خلينا نفترض ان واحد صاحبك.. عنده 30 سنة، بيشتغل أستاذ جامعى، وسمعته كويسة.. وكنت تعرف عنه انه بيشوف أفلام اباحية من أولى ثانوى، وبيمارس العادة السرية مرتين أسبوعيا.. صاحبك أُعجب بفتاة واتقدم لها.. وحصل بينهم تجاوزات أثناء فترة الخطوبة.. وجت بعد شوية هذه الفتاة ليك تسألك عنه وعن أخلاقه وسلوكه.. ومحتارة تكمل معاه واللا لأ.. رأيك هايكون إيه؟ هاتقولها إيه؟ وهاتنصحها بإيه؟
السؤال التانى:
حضرتك ــ من كلامك ــ عندك أخت.. لو أختك اتقدملها فى يوم من الأيام شخص عنده 30 سنة وأيضا أستاذ جامعى، وانت عرفت بطريقة ما إنه بيمارس العادة السرية مرتين أسبوعيا من أولى ثانوى.. موقفك هايكون إيه من هذا الارتباط؟ هاتعمل إيه؟
السؤال الثالث والأخير..
هل حضرتك مارست العادة السرية قبل كده؟ هل شوفت أفلام اباحية؟ لو كانت اجابتك آه.. هاتنصح خطيبتك انت بإيه لو قالتلك إن معرفتها بهذه المعلومات خليتها تشك فى أخلاقك.. وانها خايفة تطلع (مُغفلة) لو كملت ارتباطها بيك؟
أخى العزيز.. بعض الأسئلة بتكون اجابتها فيها.. وبوصلتها داخلها.. بتكون عاملة زى المراية اللى بمجرد ما تحطها قدام نفسك، تشوف وتعرف وتكتشف.. أرجو إنك تبص فى مراية أسئلتك كويس..
عاوز أقولك حاجة أخيرة.. وهى نصيحتى الوحيدة لك.. بعد أن تفكر.. وتستكشف.. وتجيب على ما سبق.. وده علشانها.. وعلشانك..
لو كان ما عرفته وما اختبرته من خطيبتك غير نظرتك ليها، وغير قبولك ناحيتها، وهايصعب علاقتكم.. لو كان هايقفز فى ذهنك كل شوية، وهايؤرق عليك مضجعك، وهايخليك مش مرتاح.. فأرجوك. ماتكملش فى هذا الموضوع.. من أجلها ومن أجلك.. علشان أكيد ولا انت ولا هى محتاجين تكملوا فى علاقة يملؤها الخوف.. والشك.. والحذر.. والترقب..
ربنا معاكم..
نقلا عن الشروق
