سهير وهبه
معنى اسمه طيّن بالطين
ابن حاران وعمه إبراهيم أب الأباء ورافق عمه في رحلته من أرض ما بين النهرين لكنعان (في سفر التكوين 11و 12) وجه معاه مصر (في سفر التكوين 13)
برغم انه مر ببعض الضعفات في حياته وارتبط اسمه بالخطية
ودايما لما نذكر اسمه نفتكر سدوم ونفتكر خطايا كتير
(لكن تعالوا نتأمل في شخصية لوط ونتعلم من فضائله ونتعلم من ضعفاته)
1- لوط المحبوب
يا بخت اللي يلاقي شخص يحبه في كل الظروف
وده اللي كان فعلا مع لوط لإن عمه إبراهيم أحبه جدا حتى لما اختلف معاه وتركه برضو مازال بيحبه وانقذه من الموت
2- لوط والصراع
كانت أكبر مشكلة في حياة لوط هي الصراع بين ما تعلمه من عمه إبراهيم وبين اللي تأثر بيه من زوجته وبناته وأهل سدوم
كان جواه بيجاهد علشان يكون زي عمه لكن تأثير زوجته كان أقوى في بعض الأحوال
3- لوط الحكيم
كان يمتلك حكمة كبيرة لدرجة انه لما سكن في سدوم أصبح من القضاة اللي يلجأ ليهم الشعب لحل مشكلاتهم
فَجَاءَ الْمَلاَكَانِ إِلَى سَدُومَ مَسَاءً وَكَانَ لُوطٌ جَالِساً فِي بَابِ سَدُومَ. فَلَمَّا رَآهُمَا لُوطٌ قَامَ لِاسْتِقْبَالِهِمَا وَسَجَدَ بِوَجْهِهِ إِلَى الأَرْضِ (تكوين 19)
والجلوس على باب سدوم هو للحكم
4- لوط البار وسط الفساد
لما تكلم الله مع إبراهيم وفضل إبراهيم يجاهد مع الله علشان لو فيه 50 في سدوم ينقذ سدوم من أجلهم ونزل العدد لغاية ما أبونا إبراهيم فقد الأمل في انه يوجد أبرار في سدوم وعمورة
والحقيقة ان الوحيد اللي كان بار هو لوط لأن زوجته وبناته فسدوا
وحافظ على نقاوته
(رسالة بطرس الرسول الثانية 2: 8) إِذْ كَانَ الْبَارُّ، بِالنَّظَرِ وَالسَّمْعِ وَهُوَ سَاكِنٌ بَيْنَهُمْ، يُعَذِّبُ يَوْمًا فَيَوْمًا نَفْسَهُ الْبَارَّةَ بِالأَفْعَالِ الأَثِيمَةِ.
(تعالوا نطبق اللي اتعلمناه)
1- تمسك بالشخص اللي يحبك برغم ضعفك وعصبيتك وفي كل أحوالك لأنه بيحبك بصدق وكن مثل هذا الشخص حب بدون شروط
2- حافظ انك تقوي صراع الخير اللي جواك على الشر
ولا تتأثر بمؤثرات خارجية وان حسيت نفسك هتضعف اهرب لحياتك
3- اطلب الحكمة من فوق لإن الحكمة البشرية نافعة لقليل لكن الحكمة اللي من فوق هي حكمة سماوية
4- حافظ على نقاوة قلبك حتى لو كل اللي حواليك فاسد
فالقلب النقي ربنا هينقذه حتى لو ضعف وحتى لو وسط النار هينقذه
صباح الخير على الجميع ♥️🌹
