كشفت الفنانة الشابة مريم الخشت، بداية دخولها التمثيل، قائلة : "أنا دخلت التمثيل بسبب لايك على بوست لـ الفنانة أمينة خليل".
وقالت، خلال حديثها فى برنامج "يوم ليك" والذى تقدمه الإعلامية سمر يسرى، على قناة الحياة الفضائية: "أنا أعرف أمينة خليل من زمان، ودايما فى بالى إنى مش عاوزة أمثل، رغم أنى كنت بعمل حاجات بسيطة فى المدرسة زى المسرح المدرسى، ولكن من جوايا مش عاوزة أكون ممثلة".
أضافت مريم الخشت: "فى 2013 واحدة صحبتى كلمتنى وقالتلى مش عاوزة تمثلى؟، فقلتلها آه عاوزة، وقالتلى تمام أنا شغالة دلوقتى مع تامر حبيب، وفيه شخصية حاسة إنك تقدرى تقدميها، وهابعت لهم صورك ومكلمتنيش تانى وقتها، ولغاية لما جه شهر رمضان وشفت "جراند أوتيل" واكتشفت إن هو ده المسلسل ومفهمتش حصل ايه ومحدش كلمنى ليه بس اتحرق دمى أوى وقتها".
واختتمت: "بعد سنتين كانت أمينة خليل منزِّلة موضوع عندها بتقول مين عاوز يمثل، وأنا مقدرتش أكتبلها تعليق وأقولها أنا، فروحت عملت لايك بس على البوست وراحت بعتالى رسالة، وسألتنى يعنى إيه اللايك مفهمتش عاوزة ولا لأ؟ وكانت هنا بداية دخولى التمثيل".
