استضافت الإعلامية سمر يسري الفنان محمد الشرنوبي، في برنامجها «يوم ليك»، المذاع عبر فضائية «ON» في لقاء تحدث فيه الشرنوبي عن بداياته الفنية وعن أسرته وعائلته وقدم بعض أغانيه خلال الحلقة والتي احتل اسمه بعدها مركزًا ضمن قائمة الأكثر انتشارًا «التريند» على عملاق البحث «جوجل»، وأبرز تصريحات الشرنوبي نرصدها لكم كما يلي:
عمري ما شفت نفسي وسيم ومبمدحش في نفسي
1-أنا عمري ما شفت نفسي وسيم ومتعود على شكلي ومعرفش أنا وسيم ولا مش وسيم، والحاجة اللي مش بحبها في شكلي هي مناخيري لأنها كبيرة شوية ومش هعمل عملية لأن ربنا خلقني كده لسبب وربنا قاصد كده ومبحبش التجميل وكده.
2-مبمدحش في نفسي ومبعرفش أمدح نفسي وبلوم نفسي لو عملت حاجة مش حاببها بلوم نفسي.
3-نفسي أعمل مسرح وعشان أعمل المسرح اللي بحلم بيه محتاج إمكانيات كتيرة قوي وووقت كتير قوي، وبناء حاجات كتير قوي عشان أعرف أقدمه.
أنا من «عيلة فنية جدا»
4-أنا من عيلة فنية جدًا وأبويا فاروق الشرنوبي وعمي صلاح الشرنوبي وعيلتي فنية أصيلة جدا واتربيت على المزيكا والفن ودايما بحب الفن والمزيكا، وأبويا علمني أحب الحياة واتبسط وأعمل أي حاجة عشان اتبسط وابقى بني آدم كويس.
5-كنت عايز أمثل ولفيت على كل مكاتب الكاستينج اللي في مصر ولفيت على كل شركات الإنتاج لحد ما عملت مسلسل، وكنت رافض أن والدي يتحرك معايا ولحد وقت قريب محدش كان عارف أن أبويا فاروق الشرنوبي.
6-عمي أكد أن معايا الشهادة الإعدادية فقط وده كلام صحيح ومردتش عليه لانه مش المفروض أرد عليه ودي حاجة مش عيب ولا حرام ولا غلط إني اطلع أرد، والخبر نزل بصيغة شاهد فضيحة محمد الشرنوبي .. لا أنا معنديش فضايح ومعنديش حاجة تعيب والحمد لله أنا محقق حاجات كويسة وواصل لحاجات كويسة جدا.
بصرف على نفسي وعمري 10 سنين
7-أنا بصرف على نفسي من وأنا عندي 10 سنين أو 11 سنة ومن أول حاجة اشتغلتها وقررت وقولت لأمي وأبويا أن محدش هيصرف عليا، ولحد دلوقتي أنا بصرف على نفسي من ساعتها وأنا بني آدم مسؤول وعندي بيتين مسؤول عنهم.
8-حاسس إني محقق حاجات في حياتي أفتخر بيها أكتر بكتير من الشهادة والشهادة مهمة جدا ومبقللش من أهميتها والمفروض أي حد في الدنيا يبقى معاه مؤهل عالي كويس، وده محصلش معايا بسبب ظروف في حياتي محدش يعرفها ودي ظروف مرت ببيتي وأسرتي وعيلتي ومحدش عارف ظروف حد.
9-اللي يشوفني لأول مرة يفتكرني مغرور لكن أنا خجول جدا جدًا لأبعد الحدود وميبنش عليا، ومبعرفش أقابل أول مرة حد معين وأبقى فاكك وأهزر معاه مقدرش أعمل كده لازم أخد عليه.
10-كان فيه علاقة حب في حياتي وانا دايمًا لما بحب بحب أتبسط وأعيش في حلم وأعيش اللي معايا في الحلم وأنا بحب الحب جدا وهي مكنتش على قد الحلم ده وعادة لما الواحد بيتعرف على حد بيبقى شايفة بشكل معين ولما يقعد فترة فيه حاجات بتدبل في العلاقة فبيشوفه بشكل تاني، وبعد فترة إحساسي اتغير بعد تراكمات ومشاكل وخناقات وكانت خناقات أطفال وكان عمرنا 16 و17 سنة.
يذكر أن محمد الشرنوبي شارك في مسلسل «لؤلؤ»، مع الفنانين مي عمر، أحمد زاهر، نجلاء بدر، إدوارد، وقصة مي عمر، وسيناريو وحوار محمد مهران، وإخراج محمد عبد السلام، ومن إنتاج شركة سينرجي.
