مضطر أكرر نشر البوست ده للمرة العشرين, لأن فيه ناس لسة بتسأل!
سامي حرك
معظم المصريين فاكرين إنهم بيتكلمو عربي, بسبب الشبه الكبير اللي بين الألفاظ وأصوات الحروف, إنما الحقيقة إنهم بيتكلمو مصري, مش عربي, وإن الشبه اللي بين ألفاظ اللغتين المصري والعربي له أسباب, منها:
1. البداية الواحدة للجنس البشري, حسب معظم النطريات العلمية والدينية والشعبية.
2. الهجرات البشرية قبل بداية الحضارة, كلها من أفريقيا عن طريق مصر.
3. تأثير مصر الناعم, لآلاف السنين, فـ محيطها وفـ أجزاء كتيرة من العالم القديم, من زمن نشأة الكنانة (35 ألف سنة).
4. التأثير الثقافي المصري المباشر, خلال العصر المصري, من زمن ما قبل الأسرات حتا الأسرة 31, نتيجة فترات السيادة المصرية والقوة الإقتصادية والعسكرية معظم الفترات.
5. بتبدأ العلاقة المباشرة بين العرب والمصريين زمن نهاية الأسرة 13 (حوالي1800 ق.م), من زمن التسلل الهكسوسي (40 عشيرة), وكان العرب –وقتها- عبارة عن فرع من العشيرة العبرانية (عبر/ عرب), قضو فـ مصر أكتر من 300 سنة, خدو حصيلة كبيرة من الألفاظ المصري, أثرت فـ اللغات بتاعتهم (العربي والعبري).
6. تأثير مصر العسكري والإقتصادي والثقافي, بعد طرد الهكسوس, زمن الإمبراطوريات 18,19,20, 21, 22 (حوالي 600 سنة).
7. الرحلات والتجارة والإختلاط مع المناطق والشعوب المجاورة.
8. هيمنة ثقافة المصريين من خلال المركز الثقافي الكوني "مكتبة الإسكندرية".
9. سيولة الإتصال والإنتقال بطرق جديدة, زمن الإحتلال الروماني.
10. كانت منطقة الأنباط, الملاصقة لشبه جزيرة سينا (شمال السعودية وجنوب الأردن), محطة إتصال (ترانزيت), بين تجارة القبايل العربية, والتواصل مع المدن المصرية, وبتتالي إختلاط مع رموز الحضارة المصرية, بيسمح بمرور ألفاظ كتير من اللغة المصري, وكمان ظهر الحرف النبطي من تجريد الحرف المصري الهيروجليفي والهيراطيقي والديموطيقي.
11. إستقرار قبايل عربية ونبطية, زاي "طئ" و "خزاعة", لفترات طويلة فـ سينا والصحاري الشرقية المصرية.
12. ثبوت وجود نسبة كبيرة ملحوظة (60%) من جدور الكلام المصري فـ جدور ألفاظ القرآن الكريم (المرجع الأساسي لـ اللغة العربي).
13. دخل العرب مصر سنة 642 ميلادية, وهوما بيتكلمو لغة مليانة جدور وألفاظ مصري صريحة, فمحصلش أبدن صدمة لغوية, لا لأهل البلد, ولا للداخلين عليهم, حصل التفاهم والحوار بأقل مجهود لغوي, والدليل إن مفيش ولا مرجع تراثي واحد بيثبت إن كان فيه مترجمين بين عمرو وجنوده من ناحية, والأقباط من الناحية التانية, وإن المرة الوحيدة اللي ثبتت الحاجة للمترجم كانت بين الحاكم البيزنطي والعرب.
14. إتحول غالبية المصريين للإسلام, وأبدعو إسلام مصري, بفقه وقراءات وقصص ورموز دينية بقت محور كلام المصريين.
15. تأثير مصر الثقافي فـ محيطها المباشر, من آلاف السنين, ظاهر وملموس من الوجود الأثري المصري, فـ عدد الآثار المصرية اللي موجودة فـ كل مكان حوالينا.
التأثير المصري فـ جدور كلام المنطقة اللي بيسموها بالتزوير السياسي (العالم العربي) ولو لازم تتوصف المنطقة أو تتنسب لأمة واحدة يبقا الأدق لو يتقال (العالم المصري) لأن تأثير الأمة المصرية أدق وأكبر وأقدم, يبان ده من كمية الجدور المنتشرة وكمان تصريفات الجدور بعشرات الآلاف, يعني أنا مجرد واحد من اللي بيبحثو وبيكتبو فـ دراسات الهوية المصرية, وعندي مشروع قاموس لكلام المصريين الحالي فيه أكتر من خمسين ألف كلمة بيتقال عليهم عربي, انما بمجرد ما تفتح قاموس هيروجليفي هتنبهر بكمية الجدور وتصاريفها, زاي كلمة (عين) اللي فـ الصورة تلاقيها بنفس تصاريفها فـ أكتر من ناحية, بمعنا العين العضو اللي فـ الوش, أو العين يعني الفتحة, أو العين المعين يعني بير الماية, أو العين المعنا والمعاني, أو العين التعيين والتخصيص, أو العين الخبرة والمعاينة .. لخ.
#بنتكلم_مصري قواعد وألفاظ
