كلمة حق والشهادة لله ، الإعلانات السنة دي تشرح النفس وترد القلب وتدي الواحد أمل وعمر وفتحي كمان أن اللي جاي هايبقى فل الفل علينا احتا الكل ، وكفاية انك تسمع عمرو دياب وراغب علامة ولا ميريام فارس ، وحتى مش لازم خالص تشوف هما بيعلنوا عن ايه ، المهم أنا دماغي من أول الشهر عمالة تجيب وتودي وأقول لنفسي : يا واد يا عادل لازم تجبر بخاطر الناس اللي تعبت نفسها دي وكلفت وصرفت وعملت الإعلانات دي كلها ودفعت فيها دم قلبنا ، قصدي قلبها ، فلازما وحتما ولابد انك تنفعهم .
ولما عملت "ريفيو" سريع كده للاعلانات الخيالية اللي تحس انها فوتو شوب مش ممكن تبقى حقيقي ، فبكل صراحة الواحد كان في ربع هدومه من منتجعات الريفييرا والمالديف وجزر البهاما اللي جات بقدرة قادر لمصر ، اللي ضايقني بأه انهم مش كاتبين الأسعار مع الإعلانات وده طبعا احتمال يعرض المشاهدين للنصب ، لكنه بصراحة يحميهم من الجلطات والسكتات القلبية .
عامة أنا قلت في ذات نفسيتي يعني هما اللي بيشتروا من الاعلانات دي احسن مني ولا ساكنين في فيصل زيي ولا شغالين صوحفيين أد الدنيا من 29 سنة ، رحت واخد ديلي في سناني ، هي بتتقال كده ، وقمت معمر المحفظة ونازل وقتي مشتري كيس مكرونة ليلى علوي اللوذعي وبوكسر شلبوكة الخطير .. ياللا انشالله ما حد حوش ، تقدر تقول لي بأه انت اشتريت ايه ؟
