محمد محمود
وانت نايم على بطنك وبتلعب في مناخيرك وتستعد لاطلاق فسوي جديدة في وشنا، تلعن فيها الكل وتشتم فيها الجميع وتفرق كوبونات الجنة على محاسيبك وحبايبك وتوزع كشوفات النار على الباقيين، قبل ما تعمل كل ده عزيزي المجاهد، عاوزك تاخد جولة سريعة كدا وانت برضو نايم على بطنك من غير ما تتحرك من مكانك وتشوف كدا خريطة العالم الذهبي اللي عايشين فيها، وتحكم بنفس ذات نفسك، وتقول لي وتشاور لي على اي بلد او حتى خرم دخل فيه الاسلاميين وفلح، بص كدا عزيزي المجاهد....
- لبنان، اللي كان اسمه سويسرا الشرق، واللي كان بيروح لبنان بيقول انا روحت أجمل بلد في الدنيا.... من ساعة ما دخلها اسمه ايه ده، حزب الله وهي في النازل، لحد ما وصلت للي حضرتك شايفه دلوقتي....
- فلسطين، من ساعة ما ازرائيل أنشأت منظمة خاماس ومنظمة أل جيهاد ومن ساعة ما حولنا الخناقة على جامع وهيكل والقضية كل يوم بتفقد زخمها لحد ما وصلنا ان النهاردة في قطاع كبيييير من الناطقين بالعربي مش مهتم بالموضوع من أساسه، ده غير طبعا اللي بيساندوا ازرائيل...
- ليبيا، من ساعة ما تخلصت من المجنون واحتلت مدنها مجاميع داعش والقاعدة والإخوان وهي في حرب مش عارفين سببها ولا دواعيها، لكن مجرد وجود حبايبك هناك حولها لدمار....
- سوريا، كان عندها ثورة مدنية عادية، دخلها حبايبك الدواعش، تحولت لحرب أهلية تجمع فيها كل دول العالم وخربت سوريا ومات وتشرد الملايين من ولادها، كل ده ليه؟... عشان حبايبك الاسلامويين...
- العراق، اللي كان بينضرب به المثل في مستوى ثقافة شعبه وتحضره، بعد ما دخلته ميليشيات إيران وميليشيات القاعدة وداعش، بقى نموذج للتراجع والفساد والانهيار... كل ده بسبب حبايبك الاسلامويين...
- السودان، من يوم ما نط عمر البشير على كرسي الحكم وهي في النازل لحد ما اتقسمت نصين ولولا الشعب المحترم خلعوه كان زمانها اتقسمت تاني وتالت ورابع... كل ده ليه؟... لان البشير كان بيحكم باسم الدين والشريعة...
- الصومال، من يوم ما دخلها الدواعش حبايبك وهي بقت زي حتة الجبنة الريكفور، الخروم اللي فيها اكتر من الجبنة نفسها، وكل ده ليه؟... عشان حبايبك بتوع.. إن الحكم الا لله...
- إيران، لحد الثورة في 79 كان فيها فساد لكن كان فيها حياة، دلوقتي بعد اكتر من أربعين سنة من حكم رجال الدين، أصبح فيها فساد برضو لكن مفيهاش حياة والكل عايش مرعوب في دولة الخوف...
- أفغانستان، اللي كانت بلد عادي جميل وهادي زي بقية بلاد الدنيا، لما دخلها القاعدة وطالبان والاسلامويين، بقت وكر الإرهاب في العالم وبقت ما شاء الله، بتقتل التلميذات بالقنابل في المدارس...
- مصر، اللي كانت منارة الثقافة والفن والمعرفة، أصبحت بقدرة قادر على خطى باكستان وافغانستان وفاضل شوية ونسميها نكحستان، كل ده ليه؟... برضو بسبب حبايبك الاسلامويين....
وبعد ده كله عزيزي المجاهد، جاي تتكرع في وشنا وترجع قدامنا وتقول لي والله لن نتقدم الا اذا عدنا للخلف....
