محمد السماك
- ام هنديه من يومين ابنها نزل ليها الصوره دي وقال "حب الأم الغير مشروط" هو اعتبر ان الصوره بتعكس فضل الام وحبها لان بالرغم من تعبها وانها مش قادره تتنفس ومركبه جهاز أكسجين الا انها بتعمل *للخروف* اكل، لكن في الحقيقه الصوره مؤسفه ومحزنه جدا.
- ترسخ مفهوم السيد والعبد والتابع والمتبوع بين الزوج وزوجته فحين تطالب النساء بالمساواة والمشاركة، تتم شيطنتهن ومحاربتهن ببعض النصوص المكدسه لأجل أن لا يفقدوا امتيازاتهم.
- ليه دايما بنتعامل علي إن الست هي الي المفروض تخدم الراجل، الأخت تخدم اخوها، والزوجة تخدم زوجها، والأم تخدم ابنها، والحقيقي أن كل ست تقبل علي نفسها كده هي بتعود ابنها يكون "خروف" بيتخدم ويأكل ويشرب وهو نايم ملوش أي دور ولما يكبر هيفتكر ان ده حقه وهيستني من زوجته كده.
- البنت الي تقبل بكده هي نفسها الي هتبقى في يوم أم وتضرب بنتها بسبب شغل البيت رغم إن اخوها قاعد، هي نفسها الي هتقوم بنتها من علي الأكل علشان تجيب لاخوها يشرب، هي نفسها الي هتبرر لزوجها ضربه وتعنيفه ليها وتقبل يكون (سي السيد) عليها.
- لانها اتربت تربية غلط وفهمت انها جاريه وناقصه وتقبلت فكره العبودية والوصاية وهي نفسها الي هتدافع عنها بعد كده، وحتي لو في بعض الذكور بيساعدوا في شغل البيت فهم في الآخر (بيساعدوا) وكان ده عمل مش من مسؤليته وكأنه مش واجب عليه والحقيقي أن لازم كل فرد يكون ليه دور.
- متقولش انا بشتغل بره يبقي هي تخدمني لأن الزواج عمره ما كان خدمة، والعلاقة بين الزوجين مش جواري ومالك بينفق، ولان في الغالب هي كمان بتشتغل زيك وبرضوا بتعمل شغل البيت ولأن ساعات الشغل معدودة أما تعب البيت طول اليوم ، انتوا بتساعدوا بعض في بناء أسره يبقي كل واحد هيعمل الي عليه وهتربوا ولادكم علي انهم متساوين في الحقوق والواجبات.
