مرقس كمال
الإلحاد سهل الايمان صعب
الكراهية سهلة الحُب صعب
السرقة سهلة الشغل صعب
الأنانية سهلة تعيش لغيرك صعب
الزنى سهل البر صعب
الغضب سهل الإحتمال صعب
ال.... سهل وال..... صعب
ورغم ان الظواهر تقول ان البقاء للاسهل لانه منتشر وسايد ولاننا كتير بنستسهل
الا انى وعن تجربة بقول البقاء للاصعب
الأصعب اللى حقيقى مع المسيح بيتسهل
ومن غيره بيبقى حمل تقيل مزعج بيأرقنا لدرجة اننا بنتمني الموت عشان نرتاح من هموم الدنيا
ولأننا تحت الضعف ممكن نقع ونستسهل كتير إنما الشطارة انها تكون جملة اعتراضية وتعدى ونقوم بنعمة المسيح ومتبقاش حياة مستمرة نعيشها مستلمين للضعف والاستسهال
وعشان كده بنطلب من ربنا في القداس سهل لنا طريق التقوى
وخلاصة الحكاية ببساطة يا صاحبى اننا محتاجين اختبار حقيقى لعمق العلاقة مع المسيح اللى محورها واساسها هى اب وولاده يعني ابوه الله وبنوتنا له
العلاقة اللى بنتغرق فيها بفيض حبه فننسلخ من كل اهتمام متقلنا ونبقى احنا نفسنا خفاف القلب والروح والنفس طايرين باجنحة الروح فرحانين وغامرنا سلام رغم كل الاوجاع والهموم حاسين اننا معاه وفيه لينا قيمة ولينا مكانه ومكان
بره العلاقة دى هتبقى عباده تقيلة مرهقة مستنفذة كل طاقتنا هنجهد فيها نفسنا ع الفاضي وهتوصلنا اننا نعمل كل السهل اللى قلناه واكتر من غير ما ندري ومن غير ما ندرك السبب الحقيقي وهتبقى دايماً محتارين ومندهشين ازاى انا كده مع اني بقدم عبادة
ووقتها كمان هيبقى كلامنا عن المسيح مجرد كلام وفلسفة بدون روح يقويها ويخليها تعمل فينا وفي غيرنا
يارب يسوع يا أب حنين بتشفق على الكل إتدخل فى حياة وقلب وفكر وعقل وروح كل ولادك الغاليين عليك اللى استسهلوا لأي سبب وخليهم يدوقوا ويتلذذوا بحلاوة العشرة معاك
فيتسهل لهم الصعب ويبدأوا يعيشوا صح بفرح وسلام حقيقى
28 تعالوا الي يا جميع المتعبين والثقيلي الاحمال وانا اريحكم.
29 احملوا نيري عليكم وتعلموا مني لاني وديع ومتواضع القلب فتجدوا راحة لنفوسكم.
30 لان نيري هين وحملي خفيف». ( متى 11 : 28 _ 30)
#شخابيط_انسان
