محمد أبوقمر
في الأيام السودا المنيلة بستين ألف نيله كان أهم بند في برنامج الشيخ حازم صلاح أبو اسماعيل لما كان متنيل بالنيلة مرشح نفسه لرئاسة مصر كان أهم بند في برنامجه هو منع بيع جوزة الطيب في محلات العطارة ، ساعة ما مراتي سمعته بيقول كده اتنيلت علي عينها وسرقت المرتب بتاعي كله وراحت استلفت عليه ألف جنيه بفايده 100 كل شهر وقامت شاريه بالفلوس كلها جوزة الطيب وخزنتها في الدولاب ، المصيبة إنها اقنعتني إن المرتب اتسرق مني في المواصلات وأنا جاي من الشغل ، ولما جعنا بقت تعملي الصبح سندوتش جوزة الطيب أفطر به ، ولما آجي من الشغل تقولي روح اتغدي عند أمك مادام ضيعت المرتب ، وبالليل تعملي سندوتش جوزة الطيب ، اسبوع علي كده لغاية ما بقيت زي عجل الجاموس إللي عايز ينطح الحيطه ، طبعا لما عرفت إنها حرامية اتخانقت معاها وشرشحتلي وشرشحتلها وفي الآخر مسكنا في خناق بعض راحت بنت العضاضة عضتني من ورا عضة جامدة لدرجة إن الناحية اليمين كلها من مؤخرتي طلعت في بؤها ، أنا بأه من غيظي روحت عاضضها مطلع الناحية الشمال من مؤخرتها في اسناني .
بسبب البرنامج الرئاسي للشيخ حازم بنمشي أنا ومراتي نعرج دلوقتي هي بتحدف يمين وأنا بحدف شمال ، بس اللذيذ في المسألة إن إحنا لسه عندنا خزين من جوزة الطيب يكفينا سنتين تلاته كمان ، الله يخربيت جوزة الطيب ويخربيت الأيام السودا إللي عيشونا فيها ولاد الدايخه دول.
