كنب : محمد محمود
الأستاذ فريد في فيلم لحن الخلود، قدم اغنيته الرائعة بنادي عليك في نهاية الفيلم، الفيلم فيه تلات أغاني تانيين غير بنادي عليك، هي ( وياك، يا مالكة القلب في إيدك وجميل جمال)، فريد طول الفيلم بيقول انه لسه ما وصلش للحن المفقود بتاعه وبيدور عليه، وتخيل ان التلات اغاني اللي في الفيلم مش عاجبينه ومش راضي عنهم ولسه بيدور علي لحنه المفقود؟
المقدمة الموسيقية لأغنية بنادي عليك لوحدها محتاجة دراسة وقعدة، حاجة خلابة مذهلة، أوبرا كاملة ورا الأستاذ بتعزف لحن من أجمل وافخم ألحان فريد الأطرش، حاجة تاخدك في منطقة نائية بعيد عن الدنيا واللي فيها.....
الكلمات شئ يفوق الخيال والمعاني تأسر القلوب والوجدان وخصوصا لما بيقول روحي وروحك سوا هايمين في دنيا الخيال، غنينا لحن الهوى والشدو بينا وصال.... ايه الجمال ده يا استاذ؟
صوت الأستاذ وسلطنته في بعض المقاطع وصعوده وهبوطه حسب صعود وهبوط المعاني شئ مذهل....
فريد الأطرش عبقري حقيقي، لكن مش في كل حالاته، زيه زي البحتري والفرزدق في الشعر ( جيده ليس مثله جيد، وسيئه ليس مثله سئ)، ومع ذلك لما كان بيبقى في حالة توهج إبداعي كان بيبدع لنا درر زي بنادي عليك....
الفيلم كله جمال وذوق ورقي وشياكة وإبداع، فاتن حمامة مع فريد مع مديحة يسرى مع ماجدة مع الرائع سراج منير، حاجة مبهرة فعلا....
الفن ده واللي زيه هو اللي كان بيشكل وجدان المصريين والعرب وبيشكل ثقافتهم لفترة طويلة تقترب من نصف قرن كامل، فن حقيقي وابداع حقيقي بدون دعاية وبدون افتعال..
وبعد كدا يطلع واحد هلفوت من زمن الهلافيت على شاشة التلفزيون يدافع عن المهرجانات وعن اراجوزات المهرجانات ويقول الجمهور عاوز كدا.... جمهور البانجو والترامادول بقى هو اللي بيشكل فنك وابداعك يا مصر؟
يا ريت نحارب القبح بالجمال
يا ريت نحارب التفاهة بالأصالة
يا ريت نحارب العشوائية بالرقي ده
الله يرحمك يا استاذ يا عبقري.... فريد الفريد فعلا
