أكد مؤدى المهرجانات حمو بيكا، أنه تعرض لظلم كبير فى الفترة الماضية، ولكنه تغلب على الظلم.
وأضاف حمو بيكا فى تصريحات إعلامية قائلا: "اتظلمت كتير، لما ربنا يرزقنى ويجى شخص يشيل اللقمة اللى ربنا بعتهالى، وأنا مش لوحدى وفاتح بيوت ناس كتير ورا منى بتاكل عيش".
وأضاف: " هو معاه سلطة وبيتحكم فيا لكن أنا معايا أقوى من السلطة، أنا معايا ربنا، بيجوا عليا وعلى لقمة عيشى، بلدنا فيها حرية وتعبير عن الرأى، وأنا بعبر عن رأيى بالغناء، أنت مش حاببنى مش حابب تسمعنى ده رأيك أنت بس، أنا ليا جمهورى، وملايين بيسمعونى".
وأعلن حمو بيكا خلال لقائه عن ندمه فى بداياته بعمل مهرجانات تحمل ألفاظا خارجة قائلا: " بعترف أنى غنيت كلام خارج وبنصح أى حد ميغنيش الكلام ده"
وتابع متحدثا عن خناقة حسن شاكوش ورضا البحراوى: "مينفعش يبقي ليك ميعاد وتتأخرعليه فتيجي تطلع في ميعاد غيرك وحتى لو هتعمل كده لازم تستأذن الأول"، مضيفاً أن حسن شاكوش أنزل 40 فرداً من فرقة البحراوي وقال لهم: انزلوا تحت، ولكن أحد أفراد الفرقة قال له عقب انتهائه من وصلته الغنائية: "ادعي لحمو بيكا".
ووصف بيكا، حسن شاكوش، بأنه شخص غير أصيل، لأنه كان سبباً قوياً فيما وصل إليه حالياً، بحسب قوله، مدللاً على كلامه بقوله: "أنا اللي أنتجت أغاني حسن شاكوش، ولكن مش أنا اللي عملته، أنا كنت سبب كبير مش أكتر".
يذكر أن مؤدى المهرجانات حمو بيكا، شارك مؤخرا فى أولى تجاربه التمثيلية من خلال مشاركته فى مسرحية "شمسية وأربع كراسى" والتى يشارك فيها بجانب أشرف عبد الباقى وأوس أوس ومحمد أنور ومحمد عبد الرحمن وميريهان حسين وعدد آخر من الفنانين، من إخراج مجدى الهوارى.
