حنان مفيد فوزي
اللى عليه العين... محروس من شر الحسود وأصيل من جدود لجدود، شايل فى قلبه الخير، طارح من كفوفه الجود.
اللى عليه العين... نسر جسور، جناحه حرير على أهل الخير، وذراعه حديد فوق أى شرور.
اللى عليه العين.. ف الشدة ضهر وسند وف الضيقة عزم وجَلد، بروحه يمد العون، ولا عمره طلب المدد.
اللى عليه العين... بلسان حقه ونقاء ضميره وإخلاص نواياه وانشراح صدره وعفة عقله وصواب حكمه ورسوخ خطاه.
اللى عليه العين... بقوة أمنه وأمانه وثقة ويقين إيمانه وصلابة جيشه وأعوانه وسلامة حدوده وأركانه وازدهار عصره وأوانه.
«وإن جاءكم فاسق بنبأ»... أصل الرئيس السيسى مابيعملش غير طرق وكبارى «فتبينوا أن تصيبوا قومًا بجهالة».
أومال مين يا ترى اللى حل مشكلة الكهربا، ومين اللى طور العشوائيات ومهتم بالإسكان الاجتماعى، ومين اللى عمل الصوبات الزراعية وبقى عندنا وفرة فى الخضار والفاكهة وأسعارهم فى متناول الجميع وضد جشع التجار، ومين اللى بيبنى 30 مدينة جديدة وعايز ينقل البشر من دنيا دامية إلى دنيا آدمية، ومين اللى رفع نسبة الصرف الصحى فى القرى ومين اللى بدأ منظومة التأمين الصحى ومبادرة 100 مليون صحة، ومين اللى بفضل الله خلصنا من فيروس سى، ومين اللى أصر على تنفيذ مبادرة الكشف المبكر عن الأمراض التى تصيب المرأة، ومين اللى بدأ الكشف على طلاب المدارس، ومين اللى تصدى لفيروس كورونا ومُصِر على تطعيم كل المصريين للوقاية والحماية منه.
طيب من اللى جدد منظومة التموين عشان كل حى ياخد حقه، ومين اللى تصالح مع المتعدين على الأراضى والمخالفين فى الأدوار، ومين اللى عمل 13 مجمع صناعى، وبيجتهد فى عمل تحول رقمى عالمى، ومين اللى ضبط منظومة العيش وطبق مبدأ تكافل وكرامة وحياة كريمة، مين اللى شغال فى تبطين الترع ومشروع الرى الحديث، مين اللى شيّد مدارس يابانية ومعاهد فنية على أعلى مستوى.
مين أصلًا اللى دخّل التابلت فى التعليم وحلمه يكوّن جامعات أهلية وتكنولوجية متخصصة، مين اللى بيطور السكك الحديدية ونجح فى أكبر صفقة فى تاريخ السكك الحديدية المصرية، مين اللى أساسًا غرضه يفتتح خطوط جديدة لمترو الأنفاق، ده غير القطار السريع، مين اللى جَمّل المبانى العتيقة فى وسط البلد وعايز يعيد أمجاد القاهرة التاريخية، مين اللى حمى شبابنا من مراكب الغرق الوهمية وأعاد صياغة محور المحمودية وبحيرة عين الصيرة وزيهم أماكن كتير، مين اللى شغال فى منظومة إحلال السيارات للعمل بالغاز الطبيعى، طيب ومين من الأساس حل مشكلة الغاز الطبيعى، مين اللى بيعمل متاحف حضارية جديدة وبيحافظ على سلامة ومتانة المتاحف القديمة.
مين اللى بيحمى آثار مصر وكنوزها وبيستثمرها لصالح عودة السياحة وتشغيل العمالة، مين اللى بنى دار أوبرا جديدة وعينه على تجديد جميع قصور الثقافة فى المحافظات، مين اللى بيحارب المستورد وبينتج المحلى الذى ينافسه فى الجودة، مين اللى عمل مزارع سمكية ومشروعات ثروة حيوانية، مين اللى بيقوى جيشنا العظيم بأحدث المعدات، مين أصلًا اللى حدِّث منتجاتنا الحربية وصناعاتنا الوطنية، مين اللى رجّع شرطتنا لحضن شعبها.
ومين أنهى كارثة الإخوان ويحث على تجديد الخطاب الدينى، ومين اللى بيعيد هيكلة دور العبادة وبيرمم الكنائس، ومين اللى عمل مطارات جديدة ووسع المطارات القديمة لاستقبال زوار المحروسة، مين اللى أقام احتفالية عالمية لموكب المومياوات وطريق الكباش ومعابد الأقصر الأثرية، والعالم كله وقف ليرى كيف تبنى مصر قواعد المجد وحدها!.
لما تجاوب على كل الأسئلة، هتعرف مين اللى عليه العين.
نقلا عن المصرى اليوم
