نشرت الفنانة دنيا سمير غانم منشور على حسابها الرسمي بموقع التواصل الاجتماعي تقول فيه :”تشرفت النهارده بالغناء أمام سيادة الرئيس عبد الفتاح السيسي في احتفالية #قادرون باختلاف
و سعدت و تشرفت بكلامه ليا جدا 🙏
وبنظرته اللى كلها أبوة
أحب أشكر الجمهور العظيم اللي دايما بيشجعني و شفت في عنيهم و في ردود أفعالهم فرحتهم بوجودي في الحدث الهادف مع الملايكة اللي كانوا سبب في ثقتي بنفسي النهارده بإحساسهم الصادق في تعبيرهم عن حبهم ليا الحمد لله و فرحتهم باليوم ده وان فى حد مهتم بيهم وبيفكر فيهم وفى احتياجاتهم
و بشكر كل الزملاء والأساتذة إللي اتشرفت إني كنت موجودة معاهم في نفس الحفلة و علي رأسهم الموسيقار الكبير عمر خيرت و أستاذ أشرف عبد الباقي سعيدة جدا إني ابتديت يومي بتشجيعهم و حرصهم انهم يطمنوا عليا قبل ما أطلع و كمان زملائي الأعزاء مصطفي شعبان و يوسف الشريف و المذيعين شريف مدكور و إيمان الحصري اللي مروا بظروف صعبة وعدوها بكل قوه وثبات بفضل ربنا و رحمته و كنت مبسوطة بيهم و حسيت بأد إيه أغلب الموجودين مننا كان عندهم تحديات في حياتهم زي الملايكة اللي استمدينا قوتنا منهم
النهارده و من أهلهم الأبطال.
بشكر كل القائمين علي الاحتفال د/أمل مبدا الأم التانية للقادرون
باختلاف
فخورة جدا بأخويا هشام جمال لإنه اشتغل و تعب من قلبه في إخراج الحفلة و الأغاني و اختيار الأصوات اللي دخلت قلوبنا كلنا و عن نفسي بشكره علي أغنيتي “بلادي اسلمي” كلمات الشاعر الموهوب محمد إبراهيم و ألحان العبقري المتنوع هشام جمال و توزيع الموزع الشاطر جدا مادي
و في النهاية حبايبي الغاليين بابي و مامي إتأثرت جدا النهارده اني لأول مرة أروح في يوم مهم ليا من غير ما أسمعك يا مامي بتدعيلي أو ترقيني قبل ما أنزل أو بابي بيقول لي
ربنا معاكي يا حبيب بابي
يا رب أكون شرفتكم، بحبكم و وحشتوني أوي
ربنا يرحمكم يا أغلي حاجة في حياتي ❤️
وقد شاركت الفنانة دنيا سمير غانم اليوم الأحد، باحتفالية “قادرون باختلاف” المخصصة لأصحاب الهمم وذوي القدرات الخاصة بمركز المنارة بالقاهرة الجديدة، لتكون هذه أول عودة لها بعد وفاة والديها.
وقد قدمت الفنانة أغنية بعنوان “بلادي اسلمي” باستخدام لغة الإشارة لوصف كلمات الأغنية، وذلك برفقة مجموعة من الأطفال ذوي القدرات الخاصة.
وأعربت مع ختام الفقرة الأخيرة للأغنية عن سعادتها لمشاركتها في الاحتفالية ووجهت الشكر للمشاركين في الغناء معها.
بدوره، رحب الرئيس السيسي بالفنانة، وقال لها: “مش عاوز أعزيكي ولا حاجة، ولكن ده قدر الله فينا، وأشكرك على مساهمتك في احتفالية قادورن باختلاف ده كنزنا”، لترد الفنانة “أنا بشكر حضرتك يا فندم على تقديرك لمشوار والدي وإطلاق اسمه على أحد الكباري”.
