علقت الإعلامية لميس الحديدي على واقعة تأخر القطارات بسبب موجة الأمطار وبيان هيئة السكة الحديد بالاعتذار للمواطنين، قائلة: "الهيئة قالت لازم القطارات تمشي بسرعة أقل تجنباً للأمطار.. ومعنديش مشكلة عشان سلامة الناس".
وأضافت "الحديدي"، في برنامج "كلمة أخيرة"، المذاع عبر فضائية "أون إي"، قائلة: "أنا عندي تعقيب واحد بس يخص قطار واحد وهو القاهرة أسوان رقم 997 وده كان أعجوبة لأنه قعد 36 ساعة وأتأخر عن ميعاده 24 ساعة والناس معرفتش تاخد أي وسيلة مواصلات تاني بسبب الطقس وكان القطر بيقف في كل قرية ساعتين".
وأضافت: "معنديش مانع القطارات تمشي بالراحة لسلامة الناس أو نعطلها حتى، لكن القطار ده بالذات بتاع القاهرة أسوان كان فيه مشكلة مركبة بخلاف الأمطار لأنه طلع بالليل يوم الجمعة وكان المفروض يوصل الجيزة الساعة 9 أو 10 الصبح، لكنه وصل 9:45 النهاردة. هل ده طبيعي؟!".
وتابعت بقولها: "36 ساعة !.. إزاي بقى.. دول الطبيعي 12 ممكن يزيدوا شويه.. لكن ده فوق الضعف، القطار مكنش بيقف وميه الحمامات خلصت والأكل خلص ومجلهمش أي معونة أو مساعدة.. القطار مشي معنديش مشكلة تحصل أزمة.. لكن المشكلة في إدارة الأزمة، ودي سمعة القطارات والسكك الحديد المصرية".
وأتمت: "بره ممكن تتعطل القطارات وده عادي لكن الأكل والشرب يخلصوا ودورات المياه مافيهاش مياه ده أمر طاريء.. 36 ساعة كتير!".
