أكد الإعلامي رامي رضوان أنه لم يدخل مجال الإعلام بوساطة أحد، واستعرض «رضوان» تعليقا لأحد متابعيه أثناء تقديمه برنامجه الإذاعي «تفرق» على «الراديو 9090» اتهمه خلاله بدخول الإعلام بالواسطة، إذ علق أحد المتابعين في رسالة وجهها الإعلامي رامي رضوان خلال تناوله فكرة السعادة وكتب عبر حسابه البرنامج على فيسبوك: «السعادة إنك تشتغل بالواسطة».
وعلق رضوان لمتابعه صاحب الرسالة: «ربنا يكرمك بحسن البصيرة وحسن المسيرة ويديك على قد نيتك.. والدعوة الأخيرة مش هتنولك حاجة.. لإن نيتك مستخبية ورا حسابات زائفة بيعملها البعض عشان يخشوا يهاجموا ويغلطوا في الناس وهم لا قيمة لهم».
وتابع رضوان :«واحد زي الحساب الفاكس ده داخل بيقول السعادة انك تشتغل بالواسطة وعربيات وڤيلات.. وغيرك طالع عينه».
واستكمل «رضوان» موجها حديثه إلى متابعيه: «بيلقح عليا يعني.. ده إنسان عمره ماهيدوق السعادة.. لإن جزء رئيسي من السعادة إنك تبقى راضي.. وإنما متقارنش نفسك بالغير.. ولو قارنت يبقى المقارنة في إطار إن ربنا يبارك لهم ويكرمني..عشان أقدر يبقى عنده زيهم».
وتابع رامي رضوان: «النظرة الحقودة بتاعة هذا الشخص حتى مفيش اسم حساب ليه لإنه كاتب حروف كتيرة.. مبتضايقش على فكرة من التعليقات اللي زي دي.. لإنها تضايق لو هي صح.. أنا مشتغلتش بالواسطة.. وأتمنى لو فيه أي إنسان شغلني بالواسطة يقول.. أتمنى لو فيه شخص اتوسطلي أو طلبت منه واسطة أن يفصح عن نفسه.. واسطتي الحمد لله على مدار شغلي طول 16 سنة كانت واسطة واحدة بس.. ربنا».
