محرر الأقباط متحدون
علق النائب فريدى البياضى عضو مجلس النواب ، على الضجة بشأن فيلم " أصحاب ولا أعز " ، بان ليس ان شخص يأكل ملوخية ، يعنى أننا مجتمع ملوخية وتابع قائلا اتابع كم الهجوم على فيلم أصحاب ولا أعز ، بدعوى إنه بيخدش قيم المجتمع و أصول الدين ؟!
*أولا: انا أؤمن ان ممارسة المثلية الجنسية خطية وهذا ما أربي أولادي عليه. لكن:
١-مافيش تناقض بين إني أؤمن بإن فعل معين خطأ و حرام، و بين مش من حقي أمنع حد انه يرتكب هذا الخطأ ، او ينادي بالفكر الخاطىء (طالما لا يجبر أحد عليه) (الفكر يواجه بالفكر و الرأي بالرأي).
٢-الناس اللي بتطالب الرقابة بمنع الفيلم مش واخدة بالها ان الفيلم مش معروض في مصر ! لكن معروض على منصة أجنبية لا سلطة للرقابة عليها !
٣-الناس اللي بتقول ان دا بيعلّم أطفالنا أفكار و الفاظ غلط، الفيلم مصنف (للكبار فقط) مش مفروض أطفالك يتفرجوا عليه ، و اللي بيقول كدا لازم يفهم البلاوي اللي ممكن الاطفال يتفرجوا عليها من اي شاشة متوصلة بانترنت !
٤-أنهي مجتمع اللي بتتكلم عليه؟! الفيلم بتدور أحداثه في مجتمع لبناني ، هو علشان في واحدة مصرية في الفيلم و اكلوا (ملوخية) يبقى المجتمع بقى مصري؟! احنا مش مجتمع ملوخية !
٥-الناس اللي بتطالب بمنع الفيلم ، هايمنعوه ازاي ؟ و منين؟! فيلم معروض على منصة أجنبية خاصة ، اللي بيتفرج عليها بيدفع اشتراك و يتفرج بمزاجه و المنصة عليها كم أفلام مليانة عنف و جنس و الفيلم دا ولا حاجة جنبها ! وفي نفس الوقت في افلام قيّمة و وثائقية رائعة ، لو بنفس المنطق نقفل الانترنت خالص.
٦-انا ماسمعتش عن الفيلم دا غير بعد الهجوم عليه! براڤو على المحاربين باسم القيم عملتوا أكبر دعاية للفيلم.
أخيراً: قمة العبث إني أفضل أحارب أي فكر مخالف لقيمي و عقيدتي و (مش هاقدر امنعه) بدل ما اشتغل على تربية الجيل الجديد و غرس القيم و المبادىء علشان يطلع جيل عنده مبادىء وعقيدة قوية ما تتخدش، ولا تتعور من أي حد معدّي.
