جيناتك المتنحية

المكان مدرستى الاعدادية فصل تالتة رابع الدور التانى فى المبنى الوسطانى رابع فصل على اليمين الباب اللى مرسوم عليه شجرة خضرا طارحة ورد اصفر واحمر 

 

كان يوم تلات فى الحصة التانية وكنت قاعد فى اول دكة لما كان الاستاذ رأفت اللى كنا بنحب نسمعه بيشرحلنا درس الجينات وفهمت يومها ان شكلنا ولون بشرتنا حتى طولنا وصوتنا وكل ما يتعلق بينا له علاقة كبيرة بالجينات

 

يعنى له علاقة بميراثنا اللى ورثناه من اللى قبلنا عشان كده طلعنا نشبه أهلنا واجدادنا بشكل كبير

 

وفهمت كمان اننا بنورث تصرفات وطريقة تعامل وافكار أهلنا بدون ما ندرى يعنى الشبة مش فى الشكل بس إنما في الطباع كمان

وفهمت كمان ان مش كل الصفات دى بتبان يعني فيه صفات ظاهرة وصفات متنحية

 

ومتنحية يعنى موجوده بس مش باينة ولا ظاهرة ولا مُعلنة

 

والحقيقة لما كبرت واشتبكت مع الحياة ومفاهيمها وناسها اكتشفت اننا جوانا كل الصفات ولكن بايدينا وبقرارنا نظهر صفات وننحى صفات تانية

عشان كده يا صاحبى فتش جواك وشوف جيناتك اللى ظاهرة والمتنحية وفكر وقرر تظهر ايه وتخفي ايه

شوف ايه اللى ترضى تورثه وتفتخر بيه وتورّثه للى بعدك  

وإيه اللى تعتبره جالك بالغلط وتحاول تبعده عن اللى بعدك 

قرر يا غالى تراجع جيناتك وتظهر منها

جينات الحب والترفق

جينات الصدق والحق 

جينات العفوية والبساطة 

جينات السلام والطمأنينة

جينات الصبر والاحتمال

جينات التشجيع والتحفيز

جينات القناعة والرضا

جينات كتييييير تقول انك اخترت تعيش انسان 

قرر يا صاحبى وأظهر اجمل ما فى جيناتك المتنحية