صموئيل اسكندر
برغم الرفض بنحبك
وبرغم الفرز بنعزك
لكن إيه يا وطني الحكاية ؟!
طب ما تفهمني فصول الرواية
هو أنا مش إيدي مع يدّك ؟!
هو أنا مش قلبي علي قلبك ؟!
ولا يظهر ما فارقش معاك
أكون جنبك ........ أو أكون ضِدّك
ما يفرقش معاك
أكون نِدَّك ........ أو أكون إبنك ؟!
لحظة من فضلك يا وطن
ما تبص في المراية شويه
وبعدها قولي
بين الأمم ...
عاجبك كده شكلك ؟!!
وسط الملامح
هل هو ده رسمك ؟!!
قالوا البركة في اللَّمة
وِسْط الحبايب عيد
قولت يا فرج الله
أهي حانت المواعيد
قوم تيجي ساعة القسمة
يطلع ما ليا نصيب !!
لو رِجلي مبتورة
أو إيدي مكسورة
حقك يا غالي تقول
مالهومش ف الكورة
لو حتى مش فالح
أو فاسد ، وَلَد طالح
برضو عذرك معاك
( أنا ليا في الصالح )
لكن .. طول عمري جنبك
وف شدتك ساندك
ويحين حصاد الورد أسمع
روح ربنا ياخدك
ليه يا وطن غاوي تِكسر ............
قلوب ملايين وبتحبك
ليه يا وطن ناوي تِجرح .............
وتِخلع حضني من حضنك
ليه تقبل تخَلّي ملامحك
يرسمها عنصري كارِه ؟!
وتسيب في إيده مبادئك
تكتوي بلهيب ناره
طب ما هيحمِّلك وزره !!!
وبرضو هيشيِّلك عاره !!!
هل تفتكر لحظة
في حلم أو يقظة
أقبل وأرضى بإيدك
تِشوّه كده صورتك ؟!
أو أفرح لِخُطَى رجليك
تهجر حصون عدلك ؟!
عود يا وطن تاني
رجَّع خطوط الود
معقولة يا غالي
تهجر طريق الحب ؟
كل الورود مِلكك
كل الزهور شكلك
ليه بس تعزلني ؟
ماهو برضو أنا إبنك
وبرضو بنحبك
