كتب - رومانى صبرى
شن المتشددون هجوما على النائبة أميرة العادلي، عضو مجلس النواب عن تنسيقية شباب الأحزاب والسياسيين، لتدخينها سيجارة خلال مباراة منتخب مصر أمام الكاميرون، والتي انتهت بفوز الفراعنة لنصل الى نهائي الأمم الأفريقية، ومن بين تعليقاتهم انها امراة لا يجب ان تدخن السجائر.
وردت العادلي على الهجوم عليها في تدوينة عبر حسابها الخاص على "فيسبوك" وجاء بنص التدوينة :
طيب عشان نخلص من القصة والرسايل الكتير ايوة دي صورتي ..ومش مضايقة ولا مهتمة بالموضوع ،انا بشرب سجاير ومن سنين بطت اعدها ومش مخبيه ده اصلا..ومش هاابطل السجاير واكون انسان جديد عشان انا بحب أدخن ..عادة صحية سيئة بس بحبها ..زي اللي بيحب الأكل الدسم كده بيتخن وغلط علي الصحة بس بيحبه.
ببساطة مواطن مصري زملكاوي بيشجع كورة من الطفوله وبيحضر ماتشات فريقه ومنتخب بلده ديما في الدرجة التالته مش المقصورة ولا الدرجة الأولي..بيفرح ويعيط ويتعصب ويزعق ويطنط ويهتف ويغني و بيأكل ويشرب ويدخن سجابر عادي جدا.
ومعلوماتي إن علب السجاير مكتوب عليها لا تباع لأقل من 18سنة بغض النظر عن نوعه أو شغلنته أو ديانته.
والتدخين ضار جدا بالصحة ومانصحش حد يدخن ..غير كده. انا بدخن و بحب أدخن ..وانا حرة في عالم حر .. فا نفكنا بقي من الكلام الاهبل ده ..ونشجع منتخبنا يوم الأحد وإن شاء الله الأبطال يرجعوا بالتامنه ويفرحوا مصر كلها.
