جاء خبر عودة الحياة الزوجية بين النجمين شيرين عبد الوهاب وزوجها حسام حبيب سعيد لجمهورهما، لكن في نفس الوقت صادما خاصة بعد تصريحاتها عنه طيلة فترة انفصالهما في مختلف البرامج.
بدأ الأمر في بداية ديسمبر الماضي، عندما أكدت شيرين عبد الوهاب خبر انفصالها، لتبدأ بعدها فصلا طويلا من التأكيد على أنها تحررت من قيود الزواج الذي لم يضف لها شيئا بل أخرها، فقالت:
مع نضال الأحمدية:
"أنا الآن (فري) ولكن حسام حبيب بيغير علي جدا، ولكني الآن استمتع بحياة الحرية، ولا أندم على ما ضاع مني أو فاتني فأنا أبني شيرين جديدة غير محتلة أو مستعبدة".
وفي الجزء الثاني من الحوار، قالت: "4 سنين بنام على الكنبة.. نومة الكنبة حلوة، أنا بحب حسام بس أنا بحب سرطان، حب حسام ليا بقا وجع وضعف وخوف وأنا محبش أكون ضعيفة ولا خايفة".
وتابعت شيرين عبد الوهاب "كنت ضعيفة علشان حبيت وأنا اتربيت زي أي ست مصرية إن الراجل يتشال على الراس، أنا ممكن بوردة بدبلة أنا كدا اتجوزت ومؤخر صداقي كان 25 قرش، مين ترضى بكدا غير الست المصرية لكن أنا رضيت.. رضينا بالهم والهم مش راضي بينا؟".
وأضافت: راجل مش مقدر ست بتظبط نفسها علشان هتدفن عنده في نفس المكان اللي هيدفن فيه.. صعب أوي اللي أنا فيه مش قادرة استحمله.. تعبت أوي في العلاقة دي.
وعن علاقتها إمكانية العودة لحسام حبيب، قالت شيرين: "محتاج معجزة من عند ربنا، حسام حبيب دلوعة أمه وأنا مش عايزة ولد ابن أمه عايزة راجل يحتويني وأنا مش عايزة اتكلم عنه تاني لأنه أخد أكتر من حجمه مش عايزة أغلط فيه".
وقالت أيضا في نفس المداخلة: "حسام خلاص مبقاش موجود في حياتي علشان اتكلم عنه.. دا الحيلة الدلوعة اللي عايز كلمته مسموعة، قولتله مش عاوزة أتجوز ولد علشان أنا هبقى في علاقة ماما وأنا زهقت من دور ماما عايزة أكون سندريلا برنسيسة ولا مرة عشت كحبيبة وأنا رضيت بس للأسف رضينا بالهم والهم مش راضي بينا ولا بحياتي راجل أداني أكتر ما إديت له".
مع عمرو أديب في "الحكاية":
قالت شيرين عبد الوهاب: "الراجل يفضل راجل حتى لو بيكسب في الشهر 10 جنيه، والست تفضل ست حتى لو بتكسب في الشهر 2 مليون جنيه، أنا الست دي، لو جوزي شغال سواق تاكسي وسابلي 10 جنيه وقاللي ده مقدرتي يا بنت الحلال، هقول له على راسي وأبوس جزمته وأحطها فوق دماغي كمان. لكن ملوش دعوة أنا بكسب كام".
وتابعت: "لو الراجل حس إن الست بتاعته أعلى منه في أي شيء خصوصا الماديات بيحس إنه ضعيف. لكن الراجل يفضل راجل ودكر بقرشه اللي على قد مقدرته. عاجبك يا بنت الحلال تعيشي على كده عاجبك، مش عاجبك هي دي مقدرتي روحي لحالك وسيبيني لحالي."
وكانت شيرين عبد الوهاب ظهرت حليقة الرأس في حفلها الأول بعد الانفصال في أبوظبي، وعلقت على هذه الإطلالة قائلة في برنامج "الحكاية": " أنا عملت كده عشان مكونش حلوة في عين حسام حبيب ويحصل الانفصال".
يذكر أن أخبار أزمة الخلاف بين شيرين عبد الوهاب وحسام حبيب خرجت للنور في نوفمبر الماضي عندما نشرت الإعلامية نضال الأحمدية فيديو كشفت فيه ما وصفته بتفاصيل طلاق شيرين عبد الوهاب وحسام حبيب عبر حسابها بموقع التواصل الاجتماعي Instgram.
كما أصدرت شيرين عبد الوهاب بيانا رسميا تؤكد فيه انفصالها عن الفنان حسام حبيب، محتفظة بالأسباب لنفسها.
