أعلن الفنان أحمد العوضى، خروجه من المنافسه فى موسم رمضان المقبل 2022.
وكشف العوضى، خلال مداخلة هاتفية له مع برنامج "زق عجلك" على إذاعة "شعبى إف إم"، بأن عدم مشاركته فى موسم رمضان المقبل جاءت بسبب انشغاله فى تصوير فيلم سينمائى، من المقرر عرضه خلال موسم عيد الأضحى المقبل.
وخلال الحلقة تطرق العوضى، لعلاقته بزوجته الفنانة ياسمين عبدالعزيز قائلا: "الناس بتحبنا أنا وياسمين عبد العزيز عشان إحنا طبعيين وحقيقيين، وأكيد بيحصل بينا مشاكل، بس المشاكل بين اتنين بيحبوا بعض بتبقى غير المشاكل بين اتنين متجوزين من أجل الجواز".
وأضاف: "أنا اللى بصالح ياسمين الأول، وفكرة إن حد بيصالح الأول ده مش بيقلل من الواحد خالص، وأنا كراجل بؤمن إن الأفعال أبلغ من الأقوال".
وتابع: "أى حد بيحب واحدة لازم يقف جنبها وأنا ما عملتش حاجة زيادة فى أزمة ياسمين الأخيرة، وعلى فكرة أنا طول الوقت بكون من الناس ومع الناس، وأنا صغير كنت بلعب بوكس، والرياضة كل حياتى، والناس بتختذل الحب فى حب الراجل لمراته والموضوع مش كده خالص، أنا ممكن أقول لأمى هابى فالانتاين".
يذكر أن أحمد العوضى، عرض له فى رمضان الماضى مسلسل "اللى مالوش كبير"، وشاركته البطولة الفنانة ياسمين عبدالعزيز، بالإضافة إلى كل من دينا فؤاد، خالد الصاوى، محمود حافظ، دنيا عبد العزيز، أحمد عبد الله محمود، أحمد سعيد عبد الغنى، إيمان السيد، بدرية طلبة، عايدة رياض، وعدد كبير من نجوم الشباب، وتأليف عمرو محمود ياسين، وإخراج مصطفى فكرى، ومن إنتاج شركة سينرجى.
