كتب – محرر الاقباط متحدون
قال الشاعر والكاتب مينا مجدي :" في شاب من ذوي الاحتياجات الخاصة اسمه "اندرو" نزل فيديو لايف من كام يوم علي صفحته .. الفيديو موجود للي حابب يشوفه .. منتشر في صفحات كتير .. من اصعب الفيديوهات اللي شوفتها في حياتي .. اندرو بيتكلم فيه وهو موجوع .. بيشتكي ان محدش بيسأل عليه من صحابه و خدام كنيسته .. زعلان ان محدش بيكلف خاطره ويطمن علي اخباره .. صعبان عليه انه بيتم التعامل معاه بتجاهل وقسوه .. وزي ما قال بالحرف "محدش بيحبني " .. مكنش عايز فلوس .. مكنش عايز مساعده .. كان عايز يحس انه محبوب ويلاقي في عيون اللي حواليه اهتمام ومعونه.
مضيفا عبر حسابه الخاص على فيسبوك :" اندرو كان عايز حد يفتقده ويطبطب عليه مش أكتر .. المأساة ان اندرو مات بعد الفيديو اللي عمله .. ناس بيقولوا انتحر وناس بيقولوا لأ .. بس النتيجة انه مات .. وقبل ما يموت بالجسد مات نفسيآ مليون مره .. مات في كل مره كان بيحس فيها انه منبوذ .. مات في كل مره كان بيحس بالوحدة .. ومات لما حس ان محدش بيحبه.
لافتا :" اندرو دلوقتي بين ايدين ربنا .. هو الأحن عليه من كل البشر .. وهو الرحوم الطيب جابر الخواطر .. بس لسه في بيننا زي اندرو كتير .. في كل بيت وكل كنيسه وكل شارع .. ياما في ناس متسابه .. في ناس عايشه لوحدها ومستنيه اللي يرفع سماعة التليفون يسأل عنهم .. في ناس مستنيه اللي يفتقدهم و يزورهم واللي يقدملهم مشاعر حب وقبول .. وفي ناس محتاجه بس تحس اللي يطمن عليهم ويقرب منهم .. يا كل الرعاه .. يا كل خدام الكنايس .. دوروا علي الناس المنسيه قبل ما يفوت الأوان.
