كتب - محرر الاقباط متحدون
قالت الكاتبة الصحفية نسمة تليمة :" كلام ميار الببلاوي عن أفلامها وانها نفسها تحرقها بجاز-بعيدا انها ممثلة اصلا على قدها يعني- كلام مش جديد للأسف من ناس كتير مش مؤمنة باللي بتعمله، كتير من الفنانين اعتزلوا وسكتوا والناس احترمت اختياراتهم عشان احرار، لكن الكارثة الحقيقة في تقديري لما يبقي الخطاب العام ان الفن حاجة يع وحاجة تكسف من فنانين ليهم تاريخ كبير وللأسف بعض الفنانات اللى اعتزلوا اتكلموا بالطريقة دي اكتر من مرة وواحدة منهم كانت مقدمة أعمال مسرحية عظيمة لسة بتمتع الناس وتقدم لهم معني نبيل أو ضحكة وليها قيمة قالت نفس الكلام قبل موتها.
مضيفة عبر حسابها الخاص على فيسبوك :" حاجة حزينة جدا تبين الفرق بين فنانين زمان اللي ماحدش فيهم كسب نفس مكاسب فنانين دلوقتي وبعضهم دفع من جيبه واتداين لمجرد محبته للفن واخلاصه للفكرة اللي مؤمن بيها، وبين فنانين خطابهم عن الفن بقي كدة دلوقتي بعضهم شباب وبعضهم حد لعب لهم في دماغهم وجرفها وقالهم هاتروحوا النار عشان انتوا فنانين - وده مالوش علاقة بقييم المنتج النهائى.
واختصت من يحرمون الفن :" بتشتغل ليه وانت مؤمن انه حرام؟ بتشتغل وتكسب وتتشهر ليه وانت في قرارة نفسك مؤمن ان الفن مش كلمة نبيلة أو ممارسة صادقة بتفرق في حياة البشر؟، يعني ايه فنان يجي يقول في برنامج معلش ربنا يهديني ويتوب عليا ؟ يتوب عليك من ايه لو انت بتقدم حاجة حلوة ومصدق نفسك ؟.
