حرص الفنان محمود حجازي الدفاع عن الفنانة ريهام حجاج بعد اتهام البعض لها بالتسبب في اعتزال الفنان توفيق عبد الحميد، وهو الأمر الذي نفاه الأخير.
وكتب محمود حجازي الذي يشارك في بطولة مسلسل “يو تيرن”، عبر حسابه الموثق على فيسبوك: “أنا في حاجه ماكنتش عايز أتكلم فيها، بس بجد مش قادر أشوف حد علاقتي به طيبة وبشتغل معاه وبشوفه بيتعب قد إيه وبيتعامل مع كل الناس بشكل محترم جدا، وألاقيه دايما بيتظلم من الناس من غير ما تعرف تفاصيل دائما هو اللي بيشيل المشاكل كلها سواء كان جزء منها أو ميعرفش حاجه منها”.
وأضاف محمود حجازي: “ليه بقينا بنستسهل الظلم؟ أنا السنة دي بشتغل 3 مسلسلات في رمضان وكانت سنة صعبة جدا وممتعه جدا، وأنا محظوظ أنني اشتغلت مع الأستاذ توفيق عبد الحميد، اللي لسه شايف قرار إنه بعد الانتهاء من تصوير مسلسل يوتيرن سوف يعتزل الفن”.
وتابع متحدثا عن قرار الاعتزال: “قد إيه الخبر ده زعلني جدا، وأتمني إنه يتراجع فيه ويفضل يمتعنا بفنه الحقيقي المبهر وإن شاء الله هيحصل كده، وكمان زعلت جدا لما شوفت الحملات والناس اللي عايزة تستغل الخبر ده لهدم وتشويه شخص هو بعيد كل البعد عن القرار ده، بس لمجرد إنهم عايزين يهدموا أي نجاح بشكل مليان ظلم وعدم فهم واستنتاجات ليس لها علاقة بالحقيقة”.
وأردف: “المشكلة إن دي طريقه بتتكرر وكل مرة بقول أكيد الناس هاتفهم لوحدها، بس ألاقي الموضوع مكمل بطرق غريبة، والغريب أكتر إن فيه ناس بتستغل الموضوع ده”.
وأشار محمود حجازي إلى غرضه من كتابة التوضيح، قائلا: “أنا مش بكتب الكلام ده ومستني أي حاجة غير أنني حسيت لو أنا اللي وقع عليه الظلم ده وعايز الناس تفهم بس، ده تاني عمل ليا مع الأخت العزيزة ريهام حجاج، ووالله والله أنا كلامي هتحاسب عليه قدام ربنا يعني، ولا حد في الدنيا دي كلها هيأثر عليه غير الحق، وأسف أنني طولت عليكم وكل سنه وحضراتكم طيبين”.
يذكر أن توفيق عبد الحميد أكد أن قرار اعتزاله يأتي لأسباب صحية وأنه يعتز بعلاقته مع ريهام حجاج، وقال: “قراري سببه حالتي الصحية ولا علاقة لأي شخص به، وأرجو احترام رغبتي في عدم الكلام”.
وعاد ليؤكد: “علاقتي بريهام حجاج طيبة جدا، وهي فعلا بمثابة ابنتي”.
وأضاف توفيق عبد الحميد: “الموضوع له علاقة بحالتي الصحية لأنها تستحق مني الاهتمام”.
ومسلسل “يوتيرن” من بطولة ريهام حجاج، توفيق عبد الحميد، كريم قاسم، محمود حجازي، صفاء الطوخي، عبير صبري، أيمن القيسوني، محمود حافظ وغيرهم نخبة من النجوم. المسلسل من تأليف أيمن سلامة ومن إخراج سامح عبد العزيز.
