شريف منصور
الجميل في شعبنا المصري انه اتعلم حاجات من الصغر تخليه هادي وراضي و اخر سلبيه مثل مصمصه الشفايف وايوه ياختي دبحوا ابونا وخطفوا الست ببنتها و قالوا علينا كفار و قال ايه ممنوع نطفح خلال النهار في رمضان حفاظا علي مشاعر الصائمين. نعمل ايه بلدنا وبتحبها ما احنا بنحب الاستعلاء علينا من رجال الدين ومش بس دا بيبوس اديهم . و خد عندك الدولة استراتيجيها تقف تتفرج علي العركة في الحارة وبعد ما يخلصوا علي بعض يجي حظابط ومعاه كام امين و عسكري يمسكوا كل المضروبين لان طبعا الضاربين يا فكيك ، وعلشان الامن يعمل له منظر يرجع يعمل محضر لكل واحد و يستف الدفاتر و بعد ما يرموا المضروبين في التخشيبه اسمها الرسمي الحجز .
حظابط يجيب المضروبين وهما مفيهمش نفس الساعة ٢ ولا ٣ الصبح و يقول للزبون من دول تحب تشرب ايه الغلبان يقول مش عاوز اي حاجةُ الف شكر بس اروح يا بيه ! فحظابط الهمام يقول له طيب امضي علي محضر التصالح دا وروح علي طول ومش عاوز اشوف وشك لا في الشارع ولا هنا …. اعزائي هذا ليس مشهد من فيلم ساقط هذا مشهد من بوابه العداله في مصرنا الحبيبه …
خلال الايام القليله الماضية انضرب الاقباط في وضح النهار و اتقتل كاهن و اختطفت ست و اسلاموها و ست انطردت من محل كشري لانها كافره حسب ما كتبت جريدة المصري اليوم التي تحوم حول مالكها الثاني شبهات جنائية بعدد شعر راسه ويخرج منها كالشعرة من العجين الان والاقباط منهكين تلاقي حالنظام يجيب الاقباط في نص الليل و يقول لهم حبايبي دا احنا اهل وًحلوين مع بعض ودي احداث فردية صحيح مشترك فيها اجهزة ومؤسسات الدوله بس نعمل ايه ما الاخوان مخترقين الدولة ..
الصلح خير ومجتش من المرة المليون اما تاخدوا علي قفاكم .. الست رجعت و القتال متحفظين عليه لغايه ما تهدوا وتنسوا و تاكلوا لحمة وفراخ و تشموا النسيم و تاكلوا الفسيخ و الرنجة و البيض الملون و يادار ما دخلك شر .
و لا ايه حتي اقباط المهجر تلاقي منهم اصوات جديده طلعت كده تقولك اعطونا فرصة نشوف الموضوع ايه وبلاش مظاهرات كده حتفرحوا الاخوان فينا و كأن العفونه منهم بس و حالنظام داري علي شيوخ السلفيه وعمل تمثيليه محاكمات و استجوابات و الحكاية اتنست بعد صباع المخدرات المضروبه اللي … الاقباط .
والاجمل في الموضوع و الواضح جدا جدا هو نجاح استئناس وترويض اقباط المهجر علي يد ركاب حصان طروادة من محبي الشهرة من الاقباط الذين استقطبتهم وزيرة الدولة اياها … الشعب القبطي في مصر حمد الله علي سلامتك ويا دار ما دخلك شر جديد وكفايه عليكم القديم … كل علقه وانتم بخير ومتنسوش تتكرعوا!
