ماجدة سيدهم
احتفالات المسيحيبن بكل تفاصيل مناسباتهم الدينية بكل القوة والبهجة والتفاعل دا وكأن الحدث حصل النهاردة ( وهو فعلا حقيقي) .. دا مش شو ولا مبالغ فيه ولا هو عادة أو طقس واجب عليهم إطلاقا ..
ببساطة دي حياتهم التلقائية فعلا ومش مجرد ذكريات وطقوس بيفتكروها كل سنة
ودا لأسباب بس الأول لازم نعرف حاجة مهمة أوي أن
المسيحية مش ديانة إطلاقا والمسيح في مش نبي و ماجاء الأرض علشان يقول آيات منمقة ومرصوصة جنب بعضها لكنه هو كلمة الله الآب اللي تجسدت في شخص المسيح يسوع له المجد
★ الأهم هو أن فعلا المسيح حي .. والحي حر
لو كان المسيح ميت لماتت كلمة الله فورا من وقتها وبطل الإيمان المسيحي كله وانتهى تماما لأنه بلا نفع إطلاقا من وجوده أو استمراره .. فماذا يجدي البشرية بعد موت الكلمة ؟ لاشيء
بالعكس يصبح المسيح أكذوبة خطيرة ومروعة بل وأكبر واشر خدعة في تاريخ الوجود كله ..
لو مات المسيح من دون قيامة لكنا الآن فعلا نحتفل بذكراه كمتوفي وبذكرى المناسبات المهمة اللي تخصه شأن أي رموز عظيمة توفت ورحلت عنا
لكن السيد المهوب حي .. ليس وجوده ذكرى عابرة وحياته واعماله ومعجزاته مش مجرد ذكريات مضت ..
فهل للحي ذكرى ..؟!
وكيف للمقام من الأموات بذاته يصبح ماضي ..!
فطبيعي جدا يعيش المسيحي الحقيقي حياته في حضور المسيح الحي كنمط حياة يومي بيكتسب سلوكياته وبيتكلم بلغته وبيعيش كل الأحداث اليومية بتلقائية معاه كحقيقة في حضوره ..يعني مش بيمارس طقوس في وقتها وبعدين يرجع لحياته العادية.... ودا اللي قاله الرسول بولس بالظبط "الحياة لي هي المسيح "
ووغالبا انت تقدر تفرز المسيحي من شكله وكلامه
ببساطة زي مثلا كبير العائلة اللي طالما هو موجود وعايش وسط عائلته وله سلطة وهيبة كبيرة فتلاقي كل أفراد الأسرة فخورين انهم من العيلة دي ..وبنشوف دا في العائلات الكبيرة ..أفرادها مستقرين وعايشين في حمايته من غير خوف ولا قلق لأن وراهم ضهر قوي يتسندوا عليه ويدافع عنهم بقوة مهما تعرضوا لمخاطر .. وتلاقي كل أفراد العيلة شبهه .. وارثين طباعه .. وببتكلموا زيه لأنهم عايشين معاه ليل نهار
فما بالكم كمان لو كان كبير العيلة شخص مبهج وله حضور مؤثر ومشجع في كل مكان .. تفتكروا شكل العيشة جوه العيلة دي إيه ..
الشخص دا مستحيل يكون ميت ..
هو دا المسيح الحي "واجعل روحي فيكم فتحيون"
أما الأخطر و المذهل واللي فوق العقل فعلا أن المسيح الحر صلب باختياره وبإرادته الحرة .. أنتو مستوعبين الأمر مرعب أد إيه !
وكمان يختار يموت بكل إرادته الحرة (!!!) ويقوم من الموت بذاته وبإرادته الحرة وكمان يصعد للسما بسلطانه وإرادته الحرة ..إيه دا ..!
انت لو تخيلت لحظة أنك ممكن تختار تموت وعندك القدرة تقوم من الموت بإرادتك قلبك هايقف وعقلك هايتجن ومش هاتقدر تكمل التخيل دا .. العجيب أنه فعلا حصل
فطبيعي تكون حياة المسيحي وتفكيره تشبه حياة يسوع ببساطة شديدة .. ودي بتختلف من شخص لآخر حسب مدى المسافة وقوة العلاقة مع المسيح مباشرة كرئيس للعائلة ..
المسيح الحر قام
حقا قام السيد الحي
