كتب - محرر الأقباط متحدون
البابا تواضروس عن فترة حرق الكنائس في 2013 .. كنت خايف على الوطن
أجري البابا تواضروس الثاني ، بابا الإسكندرية بطريرك الكرازة المرقسية ، حوارا إذاعيا مع الكاتب الصحفى أحمد الخطيب، في برنامج " كلم ربنا " علي الراديو "9090" ، علي مدار حلقتين كاملتين ، بمناسبة أعياد القيامة في أول حوار علي الإذاعة لقداسة البابا تواضروس .
وقال البابا تواضروس ، كان عندي أختين واحدة منهم أصغر مني كانت ساكنه جوه قلبي ، في يوم من الأيام سافرت أمريكا لمقابلة أحد الأباء الأساقفة ، واختي في الوقت دا كانت تعبانة ومريضة بتتعالج .. وقبل السفر بيوم سلمت عليها وودعتها، وصلت امريكا بعد رحلة سفر طويلة، وأول ما وصلت، بلغوني بوفاتها ! قررت الرجوع فورا ، وانا في الطيارة كلمت ربنا وصليت ودموعي في عيني.
وتابع ، كان في الكرسي اللي جنبي راكبة أجنبية كبيرة في السن ، طبطبت عليا ، وسألتني : بتعيط ليه؟ فقلت لها أختي حبيبتي توفت ، ففضلت تقول لي كلام كأنها أم، كنت بناجي ربنا من جوايا واكلمه وانا حزين، خاصة انها سابت اطفال صغيرين!
واكمل ، المواقف اللي زي دي بيكون فيها أنين ، والأنين ده لا تعبر عنه الحروف .. الأنين ده مشاعر من جوه بنبضات القلب هي اللي بترفع المشاعر لربنا .. وتكلمه!
وهناك موقف آخر تحدث خلاله مع الله، يوم 14 أغسطس عام 2013 يوم حرق الكنائس، مضيفًا : "كان يوم صعب، وكنت ساعتها فى البطريركية منذ شهور قليلة، وطبعا الخوف كان على الوطن، لأن أى مبانى هاتتبنى ولكن القضية كانت سلامة الوطن، وكان يشغلنى سلامة العلاقة بين المصريين كلهم، لأن الوطن هو القيمة الأولى لحياة الإنسان، ولما الإنسان بيتولد على أرض مصر بيبقى مصرى، ومصر لها قيمة فى العالم وفى التاريخ والجغرافيا وعند ربنا".
وتابع: " كنت بقول يا رب احفظ الوطن واستر الوطن واحفظ سلامة الأرض واحفظ واعطى هدوء وسلام للعقول، وقولت ساعتها وطن بلا كنائس خير من كنائس بلا وطن".
وأكد: " كان فى ذهنى ما يحدث فى سوريا، متعرفش مين بيحارب مين الوطن بيضيع، وهناك تم الاعتداء على كنائس وأديرة، وكان فيه خوف شديد على مصر، وكان هناك مجموعة من المخاوف الشديدة وكنت على ثقة بأنها غمة وهتعدى".
واستطرد: " بعد كده الكنائس اللى اتهدمت تم بنائها والرئيس عبدالفتاح السيسى زار الكاتدرائية، وبقيت عادة جميلة، ونشكر الله على العطايا الكثيرة".
واختتم قائلا: "كل سنة وكل أهل مصر طيبين بمناسبة شهر رمضان، وقت الصيام بيبقى وقت روحى للإنسان وفرصة للعبادة والتقرب إلى الله ومراجعة النفس والتنقية الداخلية وفرصة للإنسان عشان قلبه يرتفع إلى الله".
برنامج " كلم ربنا " علي الراديو 9090 حقق نجاحا لافتا في الموسم الحالي، ومن أشهر البرامج الإنسانية خلال شهر رمضان يذاع يوميًا الساعة 6 مساء قبل الإفطار ويعاد الساعة 8 في نفس اليوم .
البرنامج نجح في استضافة العديد من الشخصيات العامة المؤثرة يتحدث فيها كل ضيف عن لحظة صعبة تساقطت فيها دموعه وتحدث خلالها مع الله.
