د.أمير فهمى زخارى المنيا
- من هى نفرتيتى؟
- ما هى أوصاف التمثال؟
- كيف ومن اكتشف التمثال؟
- كيف تم أخذه لألمانيا؟
- إيه حكايه العين اليسرى المفقوده فى التمثال؟
- بص يا سيدي ركز كده هقوللك شوية معلومات مكنتش تعرفها عن التمثال ده...
مبدأيا كده هي مسمهاش نفرتيتي
هي اسمها "نفرت_إيتي" يعني "الجميلة حضرت" ..
نفرت يعني الجميلة وإيتي يعني أتت او حضرت.
زوجة ملك مصر إخناتون
نيجي بقى للتمثال و اللي بيعتبر من أشهر بل أشهر القطع الأثرية في العالم كله .
التمثال عبارة عن رأس للملكة طوله ٤٧" سم" ووزنه حوالي ٢٠" كيلو" و مصنوع من الحجر الجيري.
التمثال ده اكتشفه عالم اسمه لودفيج بورشاردت سنة ١٩١٢ في تل العمارنه
وكان القانون أيامها بيقسم الاكتشافات الاثرية دي بين البعثات الأجنبية و المصرية و لكن بشروط اهمها....
“ممنوع للبعثات الاجنبيه أخذ اي تمثال ملكي مصنوع من الحجر الجيرى"
طبعا الاستاذ بورشاردت اعجب بالتمثال جدا و قرر انه هياخده لألمانيا فزور في الاوراق و كتب انه مش تمثال ملكي و صوره صوره وحشه كده و بعتتها للمسؤولين في مصر و اخذ التمثال.
بعد ما التمثال اتعرض في المانيا اكتشفنا و الحمد لله انه اتسرق من عندنا وفضلت مصر في مباحثات من ايامها لحد دلوقتي عشان تسترد التمثال.
لدرجة انه ايام هتلر كانو خلاص وافقو انهم يرجعوه بس هتلر أصر انه يشوفها الاول.
طبعا اول ما شافها انبهر بعظمة التمثال وقرر أنه مش هيطلع بره ألمانيا.
وقال جملته الشهيره:-
“سأشن حربا على مصر كي لا تعود رأس نفرتيتي"
و أمر انه يتبني متحف جديد اللي هو متحف برلين حاليا وتكون نفرتيتي هي درة المتحف و بقو يسموها درة برلين.
السلطات المصرية عرضت عليهم يبادلوها بأي قطعة آثار تعجبهم في مصر وهما رفضوا.
من كتر اهميتها عن الألمان محطوطه في غرفة لوحدها في قلب المتحف .
ومحطوطه على طوابع البريد.
بيجيلها «٥٠٠ الف» سائح سنويا عشان يشوفو عظمة المصريين.
بيعتبر حاليا رأس نفرتيتي رمز للجمال في العالم كله
بيطلقو عليها لقب الموناليزا المصرية.
بيترعبو بس بمجرد ما حد يقولهم انها هترجع وانهم سرقوها.
بيتباهو بحاجه مش بتاعتهم مش فاهم ازاي.
بالنسبه للعين المفقوده: عيون نفرتيتي في باقي تماثيلها سليمة مافيش مشاكل تذكر خلقية أو حتى وصف بمرض
و في نظريات كتير بخصوص الموضوع ده أما الفنان استعجل ومكملش ودا مش منطقي وبستبعده او أن المادة سقطت مادة التطعيم الحجر الأسود سواء بلور صخري أو كوارتز ودا ناجم من النقل أو يمكن من وقت نحته او يقال انه كان بيعلم عليه الطلبه النحت عشان كده مقصود انه يتساب بالشكل ده..
شعار محافظه المنيا:
عروس الصعيد إتخذت من تمثال نفرتيتى شعارا لها وسط بقعة خضراء داله على نشاطها الزراعى المتمثل فى معظم المساحات الخاصة بها.
شعار الجامعة:
تم اختيار صورة رأس الملكة نفرتيتي داخل كتاب مفتوح شعارًاً لجامعة المنيا.
كفاية رغي بقى واسيبك تتفرج على العظمة اللي بجد اللي كان أجدادك بيعملوها ♥
معلومة بسيطه....
اللي قدامك ده تمثال عمره اكثر من ٣٠٠٠ سنه ..
والى اللقاء فى معلومه جديده ...
د.امير فهمي زخاري المنيا
-------------------------------------
المصادر:
- الآثار فى مصر "عيسى".
- اليوم السابع.
- الجزيره الوثائقيه
