كتب - محرر الاقباط متحدون
علق الكاتب محمد ماهر على فشل رجل سلفي كان اقتحم خصوصية مواطن يدعى الحاج رجب، في اقناع الاخير بالاقلاع عن التدخين بعدما اقتحم خصوصية الاخير.
وكتب ماهر عبر حسابه الخاص على فيسبوك :
ليه الفيديو بتاع الحج رجب واحد من أهم الفيديوهات في تاريخ السوشال مديا كلها ومش عايز اقول في تاريخ مصر، الفيديو دا بكل بساطة بيجسد كل ما حدث في المجتمع المصري من صراع خلال الخمسين سنة الأخيرة.
في الفيديو يظهر الشيخ الملتحي صاحب الجلباب السعودي ومعاه واحد بيصور بالموبايل عشان يوثق اللقطة وهو بيقنع الحج رجب بالاقلاع عن التدخين على الهواء.
في الجانب المقابل الحج رجب بملامحه المصرية الأصيلة وجلابيته الفلاحي قاعد في الغيط بيشرب سجارته بمنتهى الروقان والانشكاح ولا اخر الملوك المصرين .
الشيخ السلفي بدمه التقيل وشكله العكر بيجسد الفهم السلفي الوهابي للدين في المقابل الحج رجب بفهمه البسيط واللين والطيب عن الدين بيمثل الفهم الشعبي والمصري للدين باعتباره يسر مش عسر وربك رب قلوب.
الشيخ السلفي نفسه لما حب يمارس فكرة الاستحقاق والوصاية على الحج رجب وقاله ابعد السجارة شوية فتغيرت نبرة الحج رجب وبمنتهى البساطة والتلقائية والكبرياء المصري قاله روح انت الناحية التانية.
الحج رجب اللي مش عارف يقول كلام بالفصحى ومش بيطلع لسانه في الثاء قصف جبهة الأخ السلفي ٤٠ مرة في فيديو ٣ دقايق من غير ما يقوله حديث واحد على بعضه.
الحج رجب استمر في الاستمتاع بسجارته طوال مدة الفيديو رغم إلحاح وسماجة وسخافة الشيخ السلفي اللي حب يركب التريند فالحج رجب ركبه ودلدل رجليه.
الحج رجب مش مجرد شخص الحج رجب فكرة وأسلوب حياة الحج رجب أيقونة مصرية.
