رد الرئيس عبدالفتاح السيسي على الانتقادات الموجهة للحكومة بشأن الأولوية في المشروعات التي تنفذها الدولة، قائلا: "اوعى تحط رجل على رجل وتتكلم في موضوع وأنت متعرفوش".
وقال الرئيس السيسي، خلال افتتاح مشروع مستقبل مصر، اليوم السبت: "كلامي في مثل تلك الافتتاحات أو متابعة المشروعات الهدف منه إننا نفهم بعضنا البعض كل فيما يخصه الحكاية إيه.. مثال على ده، بيتقال البنية الأساسية للموضوع، تفتكروا مشروع زي ده بياخد كهرباء أد إيه، 1250 ميجاوات، تفتكروا لو كانت أولويات الدولة خلال السنوات السابقة مش داخل فيها الكهرباء كان إيه هيحصل".
وتابع السيسي: "الكلام اللي بيتقال يهمني أرد عليه مش نظري بس، لو بنتكلم على 1200 ميجا للزراعة ومكنش عندنا كهرباء تكفي البيوت، هل كان ممكن حد ياخد قرار يجهز بلد في فترة الحفاظ على بقائها من 7 سنوات من غير ما ياخد الإجراء ده، طيب المستشفيات اللي مفيش فيها كهرباء والبيوت اللي بتتقطع فيها الكهرباء في اليوم مرة واتنين وتلاتة هتعمل إيه".
وواصل الرئيس حديثه: "مكنش ممكن نتكلم في بناء مشروع زي ده أو اللي موجود في توشكى وتقولي خلي أولويات الكهرباء لمرحلة متأخرة وكذلك حجم الطرق، طريق الضبعة بيتوسع ويتم رفع كفائته، حد يقول ممكن نأخره.. انتبه اوعى تحط رجل على رجل وتتكلم في موضوع وأنت متعرفوش والناس تسمعك ويفتركوا اللي بتقوله حقيقي ويبقى أنت ظلمت نفسك وظلمت الكلام".
وأضاف الرئيس: "بنتكلم في مشروع 2.5 مليون فدان، تقريبا ممكن يكون 25% من الأرض الزراعية الموجودة على مساجة مصر بالكامل على مدى آلاف السنين، والنهاردة في الريف مش بظبط الكهرباء والمياه والطرق وعناصر أخرى في مشروع حياة كريمة والمشروع ده مع الأسعار اللي حصلت ممكن يمتد لتريليون جنيه ولا حاجة".
