د.أمير فهمى زخاري المنيا
😀امبارح الراوتر وقع على الأرض والواي فاي توقف عن البيت كله .
قلت خير وبركة أفك شوية من النت .
زهقت ، خرجت من غرفتي وعملت فنجان قهوة وقعدت في الصالة.
شوية ولاقيت ابني خارج من غرفته ، وأول ما شافني أحضان وبوس وعمل شاي وقعدنا ندردش شوية . أخبارك إيه يا بني وخطبت ولا لسه وشغال فين و..و... راح مقاطعنى وقال : سيبك من أخبارى ،🤔 حضرتك عامل إيه ، وأجازة النهاردة من الشغل ولا مزوغ ؟ قلت له لأ ، ده انا طلعت معاش من سنتين ، وانت فين دلوقتى؟ قاللى أنا اتخرجت وشغال في شركة كبيرة .. 🤔حضرتك وحشتني يابابا ، بس والله شكلك متغيرش كتير عن زمان .. هي بس شوية الشعر الابيض .
المهم ، القعدة طولت وخرجت بنتي من أوضتها وانضمت للقعدة وبعدها خرجت أختها من أوضتها وقعدوا معانا .
ما شاء الله ، بنتي الكبيرة اتخرجت وبتشتغل ، وآخر العنقود اللي لسه كنت مقدم لها في الجامعة بقت في السنة النهائية.
المفاجأة الحلوة بقي لما لاقيت باب غرفة مراتي بيزيق وبيفتح بالعافية ، وشوية ولاقيت مراتي في حضني وهاتك يابوس وعياط ... انت هنا في مصر ؟ وانا معرفش؟ انا فاكراك لسه متغرب..
قلت لها .. أنا نهيت عقدي في الخليج من زمان وزهقت من الغربة ورجعت .. بس انتي ما شاء الله عليكي وكأن الزمن ملوش دعوة بيكي .
😍😂لسه كانت مراتي بتقترح نتغدا سوا بالمناسبة الحلوة دي ، 🤭لكن يا خسارة .. إشارة الواي فاي رجعت ، وسلمنا على بعض وكل واحد رجع أوضته.
😋ولسه كنت بفكر ناخد صورة جماعية ، إبنى قال مفيش وقت 😂واقترح كل واحد ياخد صورة سلفي لنفسه ويبتعها له ، وبالفوتوشوب ابني الكبير يعمل لها مونتاج وتبقى جماعية.
ياريت نلاقى حل ... اى حد عنده حل يقوله، قبل فوات الآوان وتتفكك الأسر.
تحياتى للجميع.
د.أمير فهمى زخاري المنيا
