محرر الأقباط متحدون
عارفين ليه جيلنا طالع بعيد عن اهله واحيانا بيفضل صحابه او الاغانى او الافلام او حتى النوم عليهم ؟!
علشان الوقت اللى بيقضيه كله انتقاد لكل صغيره او كبيره .....ايه اللى انت عامله ف شعرك ده ؟ ... ايه اللى انتى لابساه ده ؟ ... ايه اللى بتتفرجى عليه ده ؟ ... خليك كدا طول اليوم قاعد قدام الزفت ده ليل نهار لحد ماتموت .... ازاى تتكلمى فى المواضيع دى ؟ ... كفايا اكل شيبسى .... كفايا كلام فى التليفون مع صحابك ....
خليك كدا طول النهار بره والبيت بقى بانسيون ... خليك كدا ماتسمعش كلامى .... انا قلتلك من الاول البت دى مش هتنفعك وماسمعتش الكلام ، تستاهل ... انتو جيل منيل وفاشل ... وطى صوتك ... على صوتك .... لمى شعرك .... ألبس شبشب .... اقعد عدل .... وطى الاغانى ... نام بقا .. اصحى كفايا نوم .... سهران ليه ؟؟ .. تخنتى اوى .... مفيش فايده فيك ...
ولوقدرت تقعد لوحدك علشان تعبت من الانتقاد والرخامه عليك ويسألوك ببراءه " انت مش بتقعد معانا ليييييه ودايما قاعد لوحدك ؟"
املوا حياه ولادكم بالمدح .... سمعوهم الكلام اللى نفسهم يسمعوه منكم بدل مايدوروا على حد بره يسمعلهم .... حسسوهم انكم قابلينهم بأى حاجه متخلفه يعملوها حتى لو كانت ان ابنك قرر يحلق نص راسه زيرو ويسيب النص التانى كانيش .... اقبلوا اختلافهم عنكم ...
تقبلوا فكره ان الابن لازم يعدى بمرحله التمرد فى حياته ولو ماعداش بيها وديه لدكتور نفسانى ... اسمعوا منهم مبرراتهم حتى لو جواكم عارفين انها غلط ... اديلهم فرصه يعبروا عن رأيهم .... اختاروا الوقت المناسب اللى تعرفوهم فيه غلطهم .... مش وهم متعصبين او مجروحين او مقهورين او مظلومين ، علشان مايحسوش بالشماته وانتوو مش شمتانين .... راجعوا كلماتكم وانتو تعرفوا بيهربوا منكم ليه ... اعرفوا ليه بيلجأوا لغيركم ؟!!!
