أشادت الفنانة شيرين عبدالوهاب بمواقف الفنانة ياسمين عبدالعزيز معها، وبخاصة بعد انفصالها عن زوجها المطرب حسام حبيب، قائلة: «ياسمين عبدالعزيز مش صاحبتي أوي بس هي ست بـ100 راجل وقفت جنبي في أزمتي، وعند مقابلتها لي قالتلي أنا عايزة اديكي حتة قلم بسبب اللي انتي بتعملي في نفسك».
وقالت «شيرين» عبر مداخلة هاتفية مع برنامج «كلمة أخيرة» الذي تُقدمه الإعلامية لميس الحديدي، عبر شاشة «on»، مساء الثلاثاء: «موضوعي بوَّخ لكن طالما الناس عارفة موضوعي من الأول، فأنا عاوزة أستغفر ربنا على الكذب اللي كذبته علشان أخلي صورة إنسان تبقى كويس».
وأضافت: «أنا كذبت رغم إني مش بحب الكذب.. كذبت في حاجات كتير علشان انا بنت أصول وعلشان أرفع صورة إنسان رغم إنه ممكن يروح في أي يوم يتجوز من عائلة تانية.. على الأقل يتجوز وأخلص منه.. لو كنت فضّلت أقول عليه كلام وحش مكنش هيعرف يتزوج.. أنا شخصيا نفسي يتجوز ويغور ويبعد عني».
وتابعت: «أنا كنت قاعدة في أمان الله مع ولادي اللي شايفين الويل.. سافرنا الساحل نقضي أسبوع علشان نفسيتنا التعبانة.. بناتي مكنوش بيعرفوا يقعدوا معايا، وظروفي كانت صعبة.. كنت عايشة مع زوج مش بيشتغل.. كنت محبوسة 24 ساعة في غرفة نومي.. قاعدة بس».
وأكملت: «أنا غلطت في نفسي، لكن مش عيب إن الست المشهورة تكون متجوزة وبتحاول تحافظ على بيتها.. كنت فاكرة إني بحافظ على بيتي لكنه مكنش بيت، دي كانت مصيدة فئران.. أنا كنت عايشة عيشة الفار اللي دخل مصيدة فار علشان ياكل حتة جبنة لغاية ما يموت».
