د. أمير فهمي زخارى المنيا
- ايه هو تحليل السكر التراكمى؟
- وايه الفرق بينه وبين السكر الصايم أو السكر العشوائى؟
- وايه علاقة السكر التراكمى بالتنبؤ بمضاعفات السكر من خراب الكلى وفقد للنظر وازمات القلب
- ومن فينا المفروض يعمل التحليل ده ويعمله كل اد ايه ...
أسئلة كتير جاتلى من المتابعين والأصدقاء، فها جاوب في المقال ده على كل الأسئلة دى...
السكر التراكمى من التحليلات اللى بدأت تاخد وضع مهم جدا في متابعه مرض السكر... وعلشان كده أنا كتبت هذا المقال بلغه سهله بعيده عن المصطلحات العلمية لكي تصل الرسالة لكل الأصدقاء...
- ايه هو بقه السكر التراكمى؟
هو مختلف تماما عن تحليل السكر الصايم أو العشوائى أو بعد الأكل بساعتين
خلينا الأول افكركم ان الدم بتاعنا عباره عن سائل هو البلازما وبتجري فيه كرات الدم الحمرا والبيضاء والصفائح والسائل ده شبه الميه مذاب به الجلكوز والأملاح وبتمشي فيها البروتينات والدهون،
الجزء السائل ده اللى بنسميه البلازما هو اللى دايب فيه السكر اللى احنا لما نعمل تحليل في البيت أو في المعمل ونطلع نقطه دم ونحطها على شريط الاختبار بنقيس السكر اللى دايب جوه السائل ده...
لكن السكر التراكمى بنقيس السكر اللى محبوس جوه كرات الدم الحمرا، اللى لزق في الهيموجلوبين (الهيموجلوبين هو المادة اللى بتدي اللون الأحمر للدم وهو البروتين المسئول عن نقل الاكسجين) ...
احنا عارفين ان السكر ماده لزجه ولها القدرة على الالتصاق بمواد أخرى، من أشهر عمليات الالتصاق جوه الدم وخلايا الجسم كلها عمليه اسمها تسكر البروتين ( Glycation ) وأشهرها التصاقه ببروتين خلايا الدم الحمرا اللى هو الهيموجلوبين...
أحنا في تحليل السكر التراكمى بنجمع كرات الدم الحمرا دى وبنشوف كميه السكر اللى لزقت جوه الهيموجلوبين (واكتر نوع هو هيموجلوبين A1C وهو اللى شايل الجلكوز وبنقدر نشوفه بسهوله بالتحليل)...
ماتنسوش ان الجلكوز لزق في كل بروتينات خلايا الجسم زى خلايا الكلى وخلايا الأوعية الدموية وخلايا شبكيه العين وده بيؤدى الى مضاعفات هاتكلم عليها في آخر المقال.
احنا دمنا فيه نسبه سكر يتراوح بين 70 و100 ملليجرام، النسبة ده فيها جزء صغير جدا بيلزق في الهيموجلوبين، لكن لو النسبة دى زادت فبيلزق جزء أكبر، فكل ما تاكل حاجه فيها سكر بيلزق جزء منه في الهيموجلوبين وبيحتفظ بيها في ذاكرته...
كرات الدم بتاعتنا طبيعيا بتعيش 3 شهور جوه دمنا، فكل كرايه دم حمرا عاصرت أفعالك خلال التلاتة شهور الأخيرة بتسجلها عليها، وبنحللها وبيسمى تحليل سكر تراكمى أي نتيجة تراكم السكر اللى لزق في كرات الدم الحمرا لمده 3 شهور ماضيه.
خلينا افكركم ان نسبه السكر في الدم مش ثابت، متذبذب على طول، يطلع وينزل مع الأكل ومع المجهود ومع الزعل والقلق ومع قله النوم الخ..
ميزه السكر التراكمى بيسجل كل الأفعال دى خلال الثلاثة شهور الماضية...
طيب ايه هي دلالات ونسب تحليل السكر التراكمى..
اقولكم:
- الطبيعى لغايه 5.6%
- ما قبل مرض السكر 5.7 – 6.4 %
- مرض السكر اكتر من 6.5%
ونكمل باقي الحديث عن السكر التراكمى في المقال القادم بإذن الله ...تحياتي.
د. أمير فهمي زخارى المنيا
