هاجم المستشار مرتضى منصور رئيس نادى الزمالك، حسين لبيب، رئيس اللجنة المؤقتة السابقة للنادى، التى كانت مكلفة بإدارة النادى الأبيض، بسبب ظهوره عبر شاشة «etc».
وقال مرتضى منصور فى تصريحات تليفزيونية عبر فضائية «الزمالك»: بمناسبة إيه يا حسين يا لبيب بتطلع، بمناسبة إن محمد صبحى، اللى قالنا امبارح (فكوا من دماغى أنا مش هرجع الزمالك)، عشان خليت مصيره فى إيده هو مش إيد النادى عشان يرجع لازم موافقته ولا عشان فرجانى ساسى اللى أنت طفشته، ولا أشرف بن شرقى، اللى أنت سبته لحد ما المدة خلصت واللاعب مشى، ولا عشان جنش، اللى أنت عملت فى عقده شرط جزائى ب2 مليون جنيه، اتكسف يا حسين، والبطولات اللى أنت حصلت عليها باللاعبين والمدربين اللى تعاقد معهم مرتضى منصور».
وأضاف: «أنا مش عاوز أقول المصايب اللى أنت عاملها، أنت سايب النادى مفيهوش جنيه، النهاردة النادى فى ربع مليار جنيه».
وتابع: «أنت نسيت جواب الضرايب اللى جاى فى عهدك أنت بـ980 مليون جنيه والأوقاف والتأمينات الاجتماعية، اتكسف».
وأردف: «أنت بتقول جددت عقد إمام عاشور، طيب إيه رأيك إن عقد إمام عاشور، أنت نسيت توثقه، فوق بقى».
واختتم: «إيه اللى أنت عملته لنادي الزمالك؟ ولا أنت ولا لجنتك كلها، كل البطولات اللى خدتها بولادى أنا، أنت بتفكرني (بأب ربى عياله ودخلهم الجامعة ويوم التخرج كان مسافر)، أنا رجعتلك».
