ماهر حبيب
بتزعلوا من المسيحى لما يهاجر وبتسموهم اقباط المهجر مع ان مسلمى المهجر كتير قوى ومع ذلك عمركم ما قلتوا مسلمى المهجر
بتزعلوا اما المسيحى يبنى كنيسة وتخلوا فتح ملهى ليلى اسهل من بناء كنيسة وأى مسلم عاوز يبنى جامع بيبنيه حتى لو وسط كوبرى اكتوبر
وزعلانين من مجرد فكرة ان يكون فيه نادى يضم مسلم ومسيحى كأن المسيحى ده عورة ما يصحش يبان فى الاوساط الرياضية وتقعد تفهم فى المتبلم يصبح ناسى ويقوم المتبلم يعايرك ان هانى رمزى كان مسيحى تقوم تقول للمتبلم يا عم ده عدى نص قرن من ساعتها محدش عتّب النجيلة وجبتوا المعلم اللى حول منتخب الفراعنة الى منتخب الساجدين ولا انسى منظر احمد فتحى زعيم العصابة وهو بيأمر لعيبة مصر تسجد علشان يبقى ترند ان المنتخب ده خاص بالمسلمين فقط
عايز تناقشنى جيب براهينك وجيب احصائية من اللجنة الاوليمبية واقول لى كام لعيب قبطى متسجل فى كل الالعاب مش بس القدم وكام لعيب مسلم وشوف بلاد تانية اخرها السنغال والكاميرون وجنوب افريقيا وحتى منتخب فرنسا فيها كل المنتسبين لأديان ربنا او حتى ما يعرفوش يعنى ايه دين لكن الموهبة طبعا تحكم ومش معقول يعنى اقباط مصر كلهم عجزة وعندهم عيوب خلقية تمنعهم من دخول الملاعب لكن الاكيد الاكيد ان اكرامى وهادى خشبة ومختار مختار وربيع ياسين ما يقدرش يستحمل يدرب واحد ويقول له الله عليك يا بطرس ايه الحلاوة دى يا مينا هو انتو يا مسيحيين معندكومش رحمة عاوزين تجيبوا لهم جلطة وشلل رعاش الرحمة حلوة خليكوا بس مشجعين من منازلهم وكفاية عليكم فيلم الارهابى لما خلى القبطى يحضن الارهابى ويقول المصريين اهمه
