د. أمير فهمى زخارى المنيا
مبدئيا مفيش كتاب تاريخي بيقول ان الهكسوس اتوا بجيش واحتلوا مصر، كل دارسي الاثار والتاريخ عارفين ان الهكسوس دخلوا مصر عن طريق هجرات وبقوا يستدعوا قرايبهم وقرايب قرايبهم علشان ينضموا لهم فى استيطان مصر، دول كانوا بيبعتوا يجيبوا نساء من آسيا يتجوزوهم. (وده هتلاقيه لو قريت موسوعة سليم حسن اللى اتكتبت من ييجى ٨٠ سنة مش اختراع او اكتشاف جديد).
طيب جت منين ان الهكسوس دخلوا مصر بالحرب؟
الحقيقة ان المصدر الرئيسي للكلام ده هو يوسيفوس فلافيوس المؤرخ اليهودي واللى برضو قال ان الهكسوس منهم بنو اسرائيل، وفى كل كتاباته كان بينصر بنى جلدته على حساب المصريين، واللى ساعد على انتشار الرؤية دى كان رواية اديبنا العالمي نجيب محفوظ كفاح طيبة فبالتالي الناس اعتبرت الكلام ده مسلم بيه فلما يطلع حد يقول الكلام ده ويتفلسف اعرف انه مقرأش كتاب واحد.
الهكسوس دخلوا مصر على فترات متتالية واستوطنوا شرق الدلتا تحديدا كأكبر معاقلهم وكانت لهم أذرع ومواليين فى اماكن كتير فى مصر، بل ان نفوذهم وصل للمنيا كمان وده خلى الملك أحمس بعد طردهم يقضى على الاذناب دى.
الوضع كان كالتالي، مستوطنين من اماكن كتير فى اسيا كونوا مجتمعات منغلقة وجيتو مقفول جوه مصر وعلشان ضعف السلطة المركزية وتزايد نفوذهم وقوتهم العسكرية وتعاملوا مع المصريين بالقسوة والعنف بل وفرضوا ضرائب على حكام مقاطعات فى مصر، (اتمسكن لحد ما اتمكن زى ما بنقول بالعامية)، اصبحوا شوكة فى ضهر الدولة المصرية والكفاح ضدهم كان من قبل سقنن رع، فى ملك مشهور اتدفن فى ابيدوس اسمه سنب كاى كشفوا عن مقبرته فى ابيدوس وده مات فى معركة فى الفترة دى، كمل بعده سقنن رع واسرته علشان يطردوهم خارج مصر عن طريق معارك حربية ونجحوا فعلا، والهكسوس فضلوا مترقبين لحد عصر تحتمس الثالث وكانوا عاوزين يرجعوا يحتلوا مصر وتحتمس هو اللى قضى على احلامهم تماما، يعنى كانوا عدو اجنبي مباشر وواضح وصريح ما اخفوش عدواتهم دى نهائي.
اما بالنسبة للكلام الغريب اللى بيقول ان الهكسوس كانوا موحدين، فى ناس بتتكلم فى التاريخ بلا معرفة تحت ستار الاسلام (والاسلام منهم برئ) بيقولوا الهكسوس كانوا موحدين والمصريين اشرار وكفار..
والحقيقة عاوز افهم فين التوحيد فى سرقة الاله المصري ست وعبادته؟
فين التوحيد فى انهم يتدفنوا فى توابيت على شكل خنازير؟
فين التوحيد فى انهم يدفنوا الاحصنة معاهم؟
فين التوحيد اللى بيدفنوا فيه نفسهم جوه أواني مسطحة؟
ما هو ده اللى عمله الهكسوس، فى المقابل المصريين آمنوا بوجود إله وحساب وعقاب وبعث وخلود،
فمين الكفار بالزبط حتى بالمقاييس العجيبة للناس دى؟
والى اللقاء في الجزء الثاني من حكاية الهكسوس ... تحياتي.
د. أمير فهمى زخارى المنيا
-----------------------------------------------------------------------------
المصادر:
- موسوعة سليم حسن: موسوعة مصر القديمة (الجزء الرابع): عهد الهكسوس وتأسيس الإمبراطورية.
- رواية اديبنا العالمي نجيب محفوظ "كفاح طيبة".
