د. أمير فهمى زخارى المنيا
هو ليه كلنا كمصريين مهتمين قوي دايما بموضوع الأرقام.
المصري من زمان في كل كلامه هتلاقيه مهتم بلغة الارقام وهو بيقول مصطلحات في حياته اليومية كلها ارقام تعالوا نشوف مصطلحات الارقام المصرية اللي دايما بيستخدمها كل مصري:
=الجملة الشهيرة قوي "ده انا بضرب اخماس في اسداس"
دي يعني الحيرة بعينها انه يضرب اخماس في اسداس ونفسي اعرف مين اول واحد قال الجملة العبقرية دي؟ اكيد موظف في المعاشات ولا حاجة ولكن ايه اللي هيخليه يضرب الارقام دي اصلا؟؟ واي حد ليه اصلا يضرب كسور في بعض عشان يتسلي؟؟ بس هي جملة فريدة من نوعها وغريبة جدا.
=كمان الجملة بتاعة "ومتقولش تلت التلاتة كام" دليل علي الحزم بقي يعني متقولش حتي تلت التلاتة وبرضه جملة اغرب من اللي فاتت ومعرفش ايه علاقتها بالحزم في الموضوع بس شاع استخدامها زي العجين اللي متلخبطوش كده!
=واما واحد بيغيب قوي عليك هتقوله برضه جملة بلغة الارقام "انت غبت وقولت عدولي" يعني برضه ارقام وعد ودايما العقلية المصرية رقمية قوي "ديجيتال"!!
=وصل الامر لدرجة ان اما نيجي نشتم برضه بنستخدم الارقام زي مثلا "اه يا ابن ستين في سبعين" وايه يعني الشتيمة في دي؟؟ هي الظاهر شتيمة ومكملتش اساسا!
=لا والشتيمة التانية برضه "يا ابن ستين كلب" او الجملة بتاعة "دي حاجة ملهاش اي تلاتين لازمة اساسا".
=وحتي اما بيتكلم المصريين عن الحقوق بتاعتهم يقولك "هاديك حقك تالت ومتلت" وكمان ممكن يقول "علي داير مليم".
=وفي كمان اما ييجي الناس تتقي شر الناس الأخرى بيقولوا ايه "خمسة وخميسة" في وشهم ويشاورا بأيديهم كلها.
=وفي الماتشات كلها لغة ارقام زي الكورة في "التمانيات" مثلا ومعظم مصطلحات الرياضة فيها ارقام بالطريقة دي.
=وكمان اما واحد يعلي قوي او يحصله موقف سيء جدا بيتقال انه كان "في سابع سما ونزل سابع ارض".
=وكمان الواحد اما ييجي يشهد علي حاجة انها حلوة بيقول "انا ابصم بالعشرة" علي كده وكمان ممكن يقول رأيه في الحاجة دي ويقول "دي مية مية" او "عشرة علي عشرة" !
=اما المبالغة الرقمية المصرية فدي موجودة يعني اما تقوله شوفت فيلم كذا ممكن حد يقول "ده من ميت سنة يا عم" وهو من سنتين مثلا!
او واحد تاني يقول "ده من ايام اهل الكهف"!!
=ولو كلمت واحد علي التليفون وابنه مثلا رد وتقوله اديني بابا هيقولك" ثانية واحدة" مع ان الواقعي بيقول دايما "دقيقة واحدة أناديه" اما المبالغ فممكن يقول "عشر دقايق اناديهولك" !! ده علي أساس انه هيناديه من سطح العمارة مش من الاوضة التانية !
=والحاجة اللي المصري متأكد منها قوي بيستخدم فيها برضه لغة الارقام زي مثلا "شوفتهم بعينيا الجوز".
=ولو جيت تطرق حد من قدامك تقوله "وريني عرض كتافك" وساعات "هز طولك"!
=وطولك بالمتر ونظرك يتقال عليه "ستة علي ستة" ووزنك بالكيلو! كل حاجة رقمية جدا مش بس مصطلحاتنا.
=وحتي اما تتكلم عن واحد تالت بتقول "فلان وعلان وترتان" والجملة الشعبية الشهيرة بتقول "سبعة صنايع والبخت ضايع"!
=ودايما الناس عندها اعتقاد في تكرار المحاولة في الجملة "التالتة تابتة" ليه بالذات المحاولة التالتة محدش عارف!!
=وعن التضحية بيتقال "اولعلك صوابعي العشرة شمع" برضه باستخدام لغة الارقام.
=ولو واحدة زي القمر بيقولوا عليها "قمر 14".
=وحتي الطلاق بيكون بالتلاتة! رقم تلاتة دايما رقم تأكيدي في كل الحالات ولكن بالذات في الاستخدام المصري زي الشتيمة حتي "ده انت طلعت تلاتة...." والحلفان " ثلاثه بالله العظيم".
يعني مش غريب علينا ابدا اهتمامنا بالأرقام واحنا معظم مصطلحاتنا وكلامنا اليومي كله ارقام في ارقام اصلا ايها الشعب الديجيتال.
والى اللقاء فى الجزء الثانى لمعرفه أصول بعض كلمات الأرقام... تحياتى.
د. أمير فهمى زخارى المنيا
