أثار الطفل محمد أسامة، جدلا واسعا عبر مواقع التواصل الاجتماعي بعد طرحه أغنية كام ملاحظة، وتعرض الفيديو كليب للعديد من الانتقادات عبر مواقع التواصل الاجتماعي، وهي من كلمات تامر حسين، وألحان عزيز الشافعي.
وعلقت والدة محمد أسامة، على الانتقادات التي تعرض لها نجلها بعد طرحه الكليب، وقالت، في تصريحات خاصة لـ القاهرة 24، إن قصة الكليب لم يكن المقصود بها أي إساءة للمدرسات كما قال البعض على مواقع التواصل الاجتماعي، موضحة: مفيش فيها أي معاكسة للمدرسة نهائي الموضوع كان فاني بمناسبة دخول المدارس.
وعن قصة فكرة الفيديو كليب قال والدة محمد أسامة: أن الأغنية أخرجها مخرج لبناني، هو صاحب الفكرة، ولما اقترح فكرة الفيديو قولنا تمام، وكان المقصود من الفيديو أن المغازلة كانت لبنت المدرسة اللي كانت في نهائية الفيديو، ولكن المخرج جابها بطريقة غلط شوية.
وتابعت والدة محمد أسامة: هو المفروض بيلهي المعلمة عشان بيعاكس بنتها، إنما الحقيقة مش فاهمة الناس ليه كل حاجة بتاخد على الجانب السيء فقط، كمان ليس منطقيا أن يعاكس تلميذا مدرسته، هيعاكس المعلمة؟.
وعن الانتقادات التي تعرض لها نجلها محمد أسامة بعد طرح فيديو كليب أغنية كام ملاحظة، قالت: مفكرش خالص التفكير اللي هما قالوا وإحنا قولنا هنحذف الفيديو كليب هنخلي الأغنية بس وأنا قولت لمدير أعماله مش عايزة فيديو كليب خالص ليه الأغاني بعد كده هتنزل على صور له فقط، والمخرج معندوش مشكلة أننا نحذف الأغنية.
تصريحات والدة محمد أسامة
واستكملت والدة محمد أسامة، حديثها قائلة: لو الجمهور خد فكرة الفيديو كليب أنه بيعاكس المعلمة، فين المشاهد الخارجة حد شافه بيمسك أيدها أو هما في الآخر مثلا حبوا بعض، إحنا كنا عاملين الفكرة من منطق مدرسة، هل حد شاف تجاوزات من المعلمة مع الطفل مثلا.
ووصلت والدة محمد أسامة، حديثها قائلة: إحنا مشكلتنا هنا صعبة جدا الناس قاعدة الانتقادات فقط، الناس بقت بتكره النجاح لبعضها، سابوا الأغنية وكلماتها ومسكوا في الفيديو كليب، أنتوا سيبتوا أنتش وأجري، اللي فنانين كبار راحوا عملوا فيديوهات عليها ونزلوها بنفسهم، وجاين تتكلموا على فيديو معمول في مدرسة من أكبر مدارس في لبنان.
واختتمت حديثها قائلة: في حاجات كتير أوي بتحصل غلط وأنتوا مبتتكلموش والغلط بتاعها بيتمادى، وهو مصورش الكليب مع مدرسة في كبارية ولا مكان خارج بره احنا بنتكلم في نطاق مدرسة شغل أطفال من قبيل الهزار يعني.
